Një rast tragjik është regjistruar mbrëmë në fshatin Batincë të Shkupit, transmeton TV21. Një 83-vjeçar, me iniciale F.I. ka ndërruar jetë në rrugë – pasi u godit nga vetura “Folksvagen Golf” me shofer A.S. (33), ka bërë të ditur Ministria e Punëve të Brendshme.
“Më 26.10.2024 në ora 19 në SPB Shkup është denoncuar se në udhëkryqin nga rruga rajonale Shkup – TEC Kozjak me rrugën “1” në fshatin Batincë të Shkupit, vetura “Folksvagen Golf” me targa të Shkupit, me shofer A.S.(33) nga fshati Cvetovë e Shkupit, ka goditur këmbësorin F.I.(83) nga fshati Batincë e Shkupit. Në fatkeqësi, pas lëndimeve të marra, ka vdekur F.I. kurse nga ana e mjekut të Ndihmës së Shpejtë është konstatuar vdekja”, thuhet mes tjerash në njoftim.
Shtohet se trupi i të ndjerit është dërguar për t’iu nënshtruar obduksionit, ndërkaq shoferi A.S. është dërguar në Spitalin e Përgjithshëm të Qytetit “Shën Naumi i Ohrit” në Shkup për të marrë mjekim ku janë konstatuar lëndime trupore.
Hetim në vendin e ngjarjes ka kryer ekipi i SPB Shkup./TV21
Burimi: TV21
