Papa Françesku nuk po përdor më ventilator mekanik për ta ndihmuar të marrë frymë gjatë natës dhe mjekët besojnë se gjendja e tij do të vazhdojë të përmirësohet, tha sot Vatikani, në raportin e fundit mbi gjendjen e papës 88-vjeçar.
Papa ndodhet në spitalin Gemelli të Romës për gati pesë javë për shkak të një infeksioni të rëndë respirator, pneumoni dypalëshe, që kërkonte trajtim të mëtejshëm.
“Është konfirmuar se gjendja klinike e Atit të Shenjtë është duke u përmirësuar”, thuhet në informacionin e fundit mjekësor të detajuar për gjendjen e tij.
Papa duhej të përdorte ajrim mekanik jo-invaziv gjatë natës, i cili përfshin vendosjen e një maske mbi fytyrën e tij.
Ventilimi tani është “pezulluar”, tha Vatikani, duke shtuar se Papa po merr akoma oksigjen përmes kanulave të vogla nën hundë.
Mjekët e Papës besojnë se infeksioni i tij është nën kontroll, tha zyra e shtypit e Vatikanit menjëherë pas publikimit të deklaratës së fundit. Papa nuk ka ethe dhe analizat e tij të gjakut janë normale.
Papa Françesku thuhet se është në gjendje të qëndrueshme dhe është përmirësuar gjatë dy javëve të fundit, por Vatikani nuk ka dhënë ende një afat kohor për lirimin e tij nga spitali, pasi ai po shërohet ngadalë.
Burimi: botasot.info
