Instituti Kombëtar i Shëndetësisë Publike të Kosovës bëri thirrje për kujdes të shtuar gjatë ditëve me temperatura të larta dhe të mbrohen grupet më të ndjeshme dhe të njohin shenjat paralajmëruese të rrezikut nga vapa.
Ky institut u kërkoi qytetarëve që të kontaktojnë të paktën një herë në ditë të moshuarit që jetojnë vetëm ose kalojnë pjesën më të madhe të kohës të izoluar, për t’u siguruar se janë mirë dhe nuk kanë nevojë për ndihmë.
Po ashtu, rikujton se fëmijët nuk duhet të lihen asnjëherë vetëm në veturë të parkuar, pasi temperaturat brenda automjetit mund të rriten shumë shpejt dhe të paraqesin rrezik serioz për jetën.
Instituti Kombëtar i Shëndetësisë Publike të Kosovës bën thirrje edhe për kujdes ndaj simptomave të goditjes nga nxehtësia.
“Nëse një person përjeton marramendje, të përziera, konfuzion ose djersitje të tepërt, duhet të kërkojë menjëherë ndihmë mjekësore”, thuhet në këtë njoftim.
Burimi: botasot.info
