UNESCO: 2,4 milionë vajza afgane të përjashtuara nga shkollimi i mesëm

Sipas një vlerësimi të publikuar sot nga UNESCO rreth 2,4 milionë vajza në Afganistan janë aktualisht të privuara nga arsimi i mesëm për shkak të politikave të qeverisë talebane.

Organizata paralajmëron se kjo shifër mund të rritet në gati 4,0 milionë deri në vitin 2030.

Afganistani është aktualisht i vetmi vend në botë ku vajzave dhe grave u ndalohet arsimimi përtej nivelit fillor. Pas marrjes së pushtetit në vitin 2021, talebanët vendosën kufizime të forta ndaj të drejtave të grave, duke i përjashtuar nga shkollat e mesme dhe universitetet dhe duke kufizuar ndjeshëm pjesëmarrjen e tyre në tregun e punës.

UNESCO e konsideron këtë politikë një shkelje serioze të të drejtave të njeriut dhe paralajmëron se pasojat do të jenë të mëdha edhe për ekonominë afgane.

Sipas organizatës, në një vend ku pothuajse gjysma e popullsisë jeton nën kufirin e varfërisë, mohimi i arsimit dhe punësimit për gratë dobëson aftësinë e familjeve për të siguruar të ardhura dhe pengon zhvillimin ekonomik.

Ekspertët paralajmërojnë gjithashtu se vajzat që nuk mund të vazhdojnë shkollimin përballen me rrezik më të madh për martesë në moshë të re dhe pasoja negative për mirëqenien e tyre.UNESCO vlerëson se Afganistani mund të humbasë rreth 9,6 miliardë dollarë të ardhura deri në vitin 2066, pasi shumë gra të arsimuara mund të mos kenë mundësi të marrin pjesë në fuqinë punëtore.