Zelensky: Mbrojtja e të drejtave të ukrainasve, rindërtimi i shtetit janë prioritete të vazhdueshme
Mbrojtja e të drejtave të ukrainasve dhe rindërtimi i shtetit janë ndër prioritetet e vazhdueshme të qeverisë ukrainase.
“Ne po përgatisim disa ngjarje të rëndësishme, për nesër dhe javën e ardhshme. Mbrojtja dhe rivendosja e të drejtave të popullit tonë, rindërtimi i Ukrainës janë prioritete të vazhdueshme. Java e ardhshme do të jetë mjaft e rëndësishme për Ukrainën për sa i përket këtyre dy detyrave”, tha Presidenti i Ukrainës Volodymyr Zelensky në fjalimin e tij të mbrëmjes .
Ai theksoi se është takuar me përfaqësuesit e Sllovakisë, delegacionin qeveritar, ministrat e punëve të jashtme, mbrojtjes dhe ekonomisë.
“Ne diskutuam për bashkëpunimin ekzistues ndërmjet shteteve tona si në nivel dypalësh ashtu edhe në strukturat e Bashkimit Evropian. Ne ramë dakord për zgjidhje të reja për hir të sigurisë së përbashkët dhe interesave tona politike”, tha Presidenti.
Siç u përmend, Ukraina tani punon në mënyrë aktive për të forcuar sanksionet e mëtejshme kundër Rusisë.
“Çështja e paketës së nëntë të sanksioneve të BE-së është aktualisht në progres. Ne presim edhe vendime të tjera, veçanërisht në lidhje me skemat për anashkalimin e sanksioneve kundër luftës, përfshirë ato financiare dhe energjetike”, shtoi Zelensky.
Ukraina: Rusia ka instaluar raketahedhëse në termocentralin bërthamor Zaporizhzhia
Forcat ruse kanë instaluar raketahedhëse të shumta në centralin bërthamor të mbyllur të Ukrainës, Zaporizhzhia, pohuan zyrtarët ukrainas të enjten, duke ngritur frikën se termocentrali më i madh atomik i Evropës mund të përdoret si bazë për të qëlluar në territorin ukrainas dhe për të rritur rreziqet nga rrezatimi.
Kompania bërthamore e Ukrainës Energoatom tha në një deklaratë se forcat ruse që pushtuan centralin kanë vendosur disa raketa-hedhëse të shumëfishta Grad pranë një prej gjashtë reaktorëve të saj bërthamorë.
Kompania tha gjithashtu se sistemet sulmuese janë të vendosura në “strukturat e reja mbrojtëse” që rusët ndërtuan fshehurazi, “duke shkelur të gjitha kushtet për sigurinë bërthamore dhe rrezatuese”.
Edhe pse rreziku i një shkrirjeje bërthamore është reduktuar shumë për shkak se të gjashtë reaktorët janë mbyllur, ekspertët kanë thënë se një lëshim i rrezikshëm i rrezatimit është ende i mundur, raporton Associated Press.
