Ukraina mohoi çdo përfshirje në sulmin e pretenduar ndaj Kremlit, të cilin presidenca ruse e quajti përpjekje “terroriste” nga Kievi, transmeton Anadolu.
“Siç ka thënë vazhdimisht presidenti (Volodymyr) Zelenskyy, Ukraina i drejton të gjitha forcat dhe fondet në dispozicion për çlirimin e territoreve të veta, dhe jo për sulm ndaj atyre të huaja”, ka thënë sekretari presidencial i shtypit i Ukrainës, Serhii Nykyforov, raportoi agjencia shtetërore e lajmeve Ukrinform.
Më herët gjatë ditës, Kremlini pretendoi se Ukraina u përpoq të godiste rezidencën e Kremlinit me dy dronë, për të cilët tha se u rrëzuan.
“Ne i konsiderojmë këto veprime si akt i planifikuar terrorist dhe tentativë ndaj presidentit (Vladimir Putin), të kryer në prag të Ditës së Fitores, Paradës së 9 Majit, në të cilën është planifikuar prania e mysafirëve të huaj”, tha Kremlini.
Ai shtoi se Putin nuk u lëndua nga sulmi i supozuar dhe se pala ruse rezervon “të drejtën për të marrë masa hakmarrëse ku dhe kur e sheh të arsyeshme”.
Pas lajmit për tentativën e sulmit, Moska ndaloi fluturimet me dron në kryeqytet.