Një aspekt i luftës janë edhe robërit e saj.
Ukraina ka njoftuar se ka kapur 200 robër të ushtrisë ruse.
Gjeneralmajori ukrainas, Borys Kremenetsky, u tha gazetarëve në Uashington të shtunën se Ukraina kishte kapur rreth 200 ushtarë rusë të cilët ishin “të pajisur keq”.
“Kemi kapur rreth 200 ushtarë rusë, disa prej tyre 19 vjeç, të pa trajnuar fare, të pajisur keq. Ne i trajtojmë ata sipas Konventës së Gjenevës, sipas ligjit ndërkombëtar humanitar,”, tha Kremenetsky, i cili është një zyrtar i mbrojtjes në Ambasadën e Ukrainës.
Ai tha gjithashtu se ushtarëve u lejohej të “telefononin prindërit e tyre” dhe iu dhanë ushqim dhe ujë.
Kremenetsky tha se ai po punon ngushtë me Pentagonin, por Ukraina ka ende nevojë për më shumë mbështetje me ndihmën ushtarake.
“Ekziston një listë e kërkesave thelbësore dhe ne kemi ende nevojë për më shumë aftësi. Mund t’ju siguroj se ato që kemi marrë tashmë janë përdorur në mënyrën e duhur,” tha ai.
