Shitja e biletave për finalen e Conference League që do të zhvillohet në Tiranë ngjalli shumë polemika. UEFA ka adresuar zyrtarisht , teksa ka lëshuar një deklaratë publike.
Autoriteti më i lartë i futbollit evropian është ndalur te rishita e biletave për herë të dytë ose të tretë nga ana e personave që i kanë blerë në faqen e saj, duke theksuar masat që do të merren në këto situata.
“Të gjitha biletat për ndeshjet finale menaxhohen nga UEFA dhe u nënshtrohen termave dhe kushteve strikte që ndalojnë reklamimin, rishitjen ose transferimin e tyre të paautorizuar.
Si e tillë, çdo biletë që ofrohet për shitje nga palë të treta në internet (duke përfshirë mediat sociale, tregjet dhe platformat dytësore të biletave) reklamohet në kundërshtim me termat dhe kushtet e biletave.
UEFA zbaton në mënyrë aktive termat dhe kushtet e saj të biletave, duke përfshirë monitorimin e internetit, dhe do të ndërmarrë veprime (duke përfshirë anulimin e biletave) kur identifikohen reklamime të paautorizuara.
Tifozët duhet gjithashtu të jenë të vetëdijshëm se palët e treta që ofrojnë bileta për shitje në internet shpesh nuk i kanë në posedim biletat që ata pretendojnë se i kanë për t’i shitur, pavarësisht se kërkojnë çmime të tepruara për bileta të tilla.
Për më tepër, UEFA është e ndërgjegjshme se kërkesa për biletat e ndeshjeve finale mund të rezultojë në hyrjen e biletave të falsifikuara në tregun dytësor, siç ka ndodhur në finalet e mëparshme. Tifozëve u bëhet me dije që çdo biletë e tillë e falsifikuar nuk mund t’u garantojë hyrjen në stadiume.
Shitja e biletave për publikun e gjerë kryhet ekskluzivisht nga UEFA. Skuadrat që kanë arritur në finale kanë marrë edhe një pjesë të biletave për finalen e tyre përkatëse dhe janë në proces shitjeje për tifozët e klubeve finaliste. Tifozët e ekipeve pjesëmarrëse këshillohen të kontaktojnë drejtpërdrejt klubet për informacione të mëtejshme mbi proceset e shitjes së biletave për tifozët e tyre.
Teksa UEFA e kupton se do të ketë tifozë që nuk kanë pasur sukses në aplikimin e tyre për të blerë bileta, njëkohësisht i këshillon fuqimisht këta tifozë të mos udhëtojnë në finale pa bileta ose të blejnë bileta në tregje dytësore. Për të garantuar sigurinë e tifozëve, mbajtësit e biletave duhet të jenë të vetëdijshëm se në finale do të kryhen kontrolle dhe autoritetet lokale në qytete do të marrin masa kundër rishitjes së paautorizuar të biletave.”, thuhet në njoftimin e UEFA-s.
