Sulmuesi brazilian Vinicius Junior është përgjigjur pasi një agjent spanjoll përdori një sharje në baza racore ndërsa kritikoi festimet e lojtarit në televizion.
Vinicius Jr ka thënë se nuk do të ndalojë së kërcyeri pasi lëshoi një deklaratë emocionale në përgjigje të abuzimit racist që mori nga presidenti i agjentëve të futbollit spanjoll, Pedro Bravo, përcjell KosovaPress.
Kur diskutoi brazilianin gjatë një transmetimi të drejtpërdrejtë në kanalin spanjoll “El Chiringuito”, Bravo tha:
“Duhet të respektoni kundërshtarët tuaj. Kur shënoni një gol, nëse doni të kërceni Samba, duhet të shkoni në sambodromo në Brazil. Duhet të respektoni shokët tuaj dhe të ndaloni së luajturi majmunin”.
Ylli i Real Madridit i është kundërpërgjigjur Bravos në “Twitter”, duke lëshuar një deklaratë të fuqishme përmes videos ku thuhet:
“Përderisa ngjyra e lëkurës është më e rëndësishme se shkëlqimi i syve, do të ketë luftë. Unë e kam atë frazë të bërë tatuazh në trupin tim. Këtë mendim e kam përherë në kokën time. Dhe kam qëndrime në jetën time që e kthejnë këtë filozofi në realitet”, shkruante Vinicius.
“Thonë se lumturia shqetëson. Lumturia e një braziliani të zi të jetë i suksesshëm në Evropë shqetëson shumë më tepër. Por vullneti im për të fituar, buzëqeshja ime dhe shkëlqimi në sytë e mi janë shumë më të mëdha se kaq. As mos u mundoni ta imagjinoni sa. Ato janë vallëzime për të festuar diversitetin kulturor të botës. Pranojeni! Respektojeni! Ose çmenduni… Në çdo rast, nuk do të ndalem!”, shkruante më tej ylli brazilian.
