Ankaraja i bën thirrje Libisë dhe Egjiptit që të fillojnë dialogun dhe negociatat “sa më shpejt të jetë e mundur” për të zgjidhur mosmarrëveshjet midis dy vendeve lidhur me demarkacionin e kufijve detarë, thanë burime diplomatike turke, transmeton Anadolu Agency (AA).
Komentet e burimeve erdhën pasi Libia kundërshtoi vendimin e 11 dhjetorit të Egjiptit për të demarkuar në mënyrë të njëanshme kufijtë e saj detarë perëndimorë me Libinë fqinje me nëntë koordinata gjeografike.
Duke theksuar se për vijën kufitare nuk u ra dakord përmes negociatave dypalëshe midis Libisë dhe Egjiptit, burimet thanë se Türkiye favorizon fillimin e dialogut dhe negociatave midis Egjiptit dhe Libisë sa më shpejt të jetë e mundur për delimitimin e kufirit të tyre në përputhje me të drejtën ndërkombëtare, dhe në këtë kuadër, aplikimin e të gjitha mjeteve paqësore të parashikuara në nenin 33 të Kartës së OKB-së, duke përfshirë Gjykatën Ndërkombëtare të Drejtësisë, mbi bazën e pëlqimit të ndërsjellë.
Burimet thanë se vendimi i Egjiptit nuk prek shelfin kontinental të Türkiyes në Mesdheun Lindor.
Nuk është e qartë se cila metodë është përdorur për përcaktimin e kësaj vije kufitare apo nëse janë marrë parasysh rrethana të veçanta/relevante gjeografike apo është respektuar plotësisht parimi i barazisë, shtuan ata.
Burimet thanë gjithashtu se vija kufitare e deklaruar duket se shkel të drejtat e shelfit kontinental të Libisë, pasi ajo është vendosur në perëndim të vijës së mesit midis brigjeve kontinentale të këtyre dy vendeve.
“Në fakt, pala libiane bëri një deklaratë më 16 dhjetor 2022 se të drejtat e tyre janë shkelur nga dekreti presidencial i Egjiptit”, deklaruan burimet.
