Türkiye ka arritur të eliminojë pothuajse të gjithë terroristët e PKK-së nga rajoni Zap në Irakun verior, tha ministri i Mbrojtjes Kombëtare Hulusi Akar, raporton Anadolu Agency (AA).
Gjithsej 506 terroristë janë neutralizuar që kur Türkiye nisi operacionin antiterrorist ndërkufitar “Kthetra-Dryni” prillin e kaluar, u tha Akar gazetarëve pas një takimi të kabinetit në kryeqytetin Ankara të hënën.
“Operacioni ‘Kthetra-Dryni’ ka arritur në një fazë të caktuar. Zona e Zapit është pastruar në masë të madhe nga terroristët”, tha ai.
“Me këtë operacion, një linjë 302 kilometra përgjatë kufirit me Irakun është siguruar”, shtoi Akar.
Forcat turke shkatërruan rreth 600 shpella dhe strehimore të terroristëve në rajon, tha Akar, si dhe më shumë se 2.000 mina dhe eksplozivë të improvizuar.
Rreth 1.174 armë dhe 533.275 fishekë u konfiskuan, tha ai.
Akar ripohoi respektin e Türkiye-s për kufijtë, sovranitetin dhe integritetin territorial të të gjithë fqinjëve, veçanërisht Irakut dhe Sirisë.
“Objektivi ynë i vetëm është mbrojtja dhe siguria e kombit tonë. Kjo është ajo për të cilën ne po punojmë dhe do të bëjmë gjithçka që duhet bërë”, theksoi shefi i mbrojtjes turke.
Me operacionin “Kthetra-Dryni”, forcat turke shënjestruan strehët e grupit terrorist PKK në rajonet Metina, Zap dhe Avasin-Basyan të Irakut verior, pranë kufirit turk.
Ajo u parapri nga dy operacione – “Kthetra-Tigri” dhe “Kthetra-Shqiponja” – të nisura në vitin 2020.
Në fushatën e saj terroriste më shumë se 35-vjeçare kundër Türkiye-s, PKK – e listuar si një organizatë terroriste nga Türkiye, SHBA-ja dhe BE-ja – ka qenë përgjegjëse për vdekjen e më shumë se 40.000 njerëzve, duke përfshirë gra, fëmijë dhe foshnja.
