Presidenti i SHBA-së Donald Trump foli sot për gjendjen e tregjeve financiare, duke thënë se ai “po shikonte se çfarë po ndodhte me bonot” mbrëmë dhe vuri re se “disa po nervozoheshin”, por i pyetur nëse për këtë ka marrë vendimin e sotëm për tarifat, ai u përgjigj se “tregu i bonove është i mrekullueshëm tani”.
Ai shtoi se lëvizja e sotme nuk ishte vendimtare, por kthesa e vërtetë ishte 2 prilli, kur ai prezantoi paketën e tij tarifore.
“Pastaj ne kishim Ditën e Çlirimit në Amerikë. Ne hoqëm qafe të gjitha marrëveshjet e këqija dhe marrëveshjet tregtare që na kishin mbytur për vite me radhë”, tha Trump.
Investitorët kanë investuar shumë në obligacionet e qeverisë amerikane javët e fundit. Por të hënën, pati një kthesë – ata filluan t’i shesin.
Rendimenti i obligacioneve 30-vjeçare amerikane arriti sot në 4.92 për qind, kërcimi më i madh tre-ditor që nga viti 1982.
Pavarësisht vendimit të Trump për të shtyrë përkohësisht vendosjen e tarifave për shumicën e vendeve, ekonomia amerikane mbetet në rrezik serioz të recesionit, paralajmëron Goldman Sachs.
Në analizën e sotme për klientët, ekonomistët e një prej bankave më me ndikim të investimeve në Wall Street vlerësojnë se ekonomia amerikane do të rritet me vetëm 0.5 për qind në vitin 2025, ndërsa në të njëjtën kohë vlerësojnë se ka një shans 45 për qind që vendi të hyjë në recesion vitin e ardhshëm.
Përpara se Trump të shpallte një pauzë 90-ditore për shumicën e tarifave, Goldman Sachs vlerësoi se një recesion ishte rezultati më i mundshëm, duke pasur parasysh numrin dhe shtrirjen e masave tregtare të prezantuara. Me fjalë të tjera, SHBA nuk ka dalë ende nga zona e rrezikut, sipas Goldman Sachs.
Këshilltari kryesor i tregtisë i Trump, Peter Navarro, tha se kritikët e tarifave nënvlerësojnë aftësitë negociuese të Trump.
“Të gjithë ata analistë nervozë të Wall Street-it e kanë përsëri gabim. Ata vazhdojnë të nënvlerësojnë aftësinë e presidentit për të negociuar marrëveshje të favorshme,” tha ai për Fox Business.
Navarro thotë se qëllimi në fazën tjetër të negociatave është të reduktohet ndjeshëm deficiti tregtar i SHBA-së dhe të krijohet një fushë loje më e barabartë në tregtinë ndërkombëtare.
Navarro ka mbrojtur më parë politikën ekonomike të Trump, duke theksuar se aplikimi i gjerë i tarifave nuk është një mjet presioni, por një instrument për të mbrojtur interesat amerikane.
Kujtojmë, presidenti Trump njoftoi një pauzë 90-ditore në tarifat hakmarrëse për të gjitha vendet përveç Kinës. Ai rriti tarifat ndaj Kinës nga 104 për qind në 125 për qind, pasi Kina, në përgjigje të tarifave të Trump mbi të, vendosi një tarifë të re prej 84 për qind për produktet amerikane.
“Bazuar në mungesën e respektit që Kina ka treguar për tregjet globale, unë rrit tarifën që Shtetet e Bashkuara po i ngarkojnë Kinës në 125%, në fuqi menjëherë. Shpresoj që Kina, në një moment, të kuptojë se ditët e shfrytëzimit të Shteteve të Bashkuara dhe vendeve të tjera kanë mbaruar dhe se kjo nuk është më e qëndrueshme apo e pranueshme.”
“Nga ana tjetër, dhe bazuar në faktin se më shumë se 75 vende kanë ftuar përfaqësues të SHBA-së, duke përfshirë Departamentin e Tregtisë, Departamentin e Thesarit dhe Zyrën e Përfaqësuesit të Tregtisë së SHBA-së, për të negociuar një zgjidhje për çështjet në shqyrtim që lidhen me tregtinë, barrierat tregtare, tarifat, manipulimin e monedhës dhe masat jo-monetare, dhe ato vende nuk ndërmorën asnjë masë hakmarrëse ndaj SHBA-së, nën propozimin tim të fuqishëm, kam autorizuar një pauzë 90-ditore dhe një tarifë reciproke dukshëm më të ulët prej 10% gjatë kësaj periudhe, gjithashtu në fuqi menjëherë. Faleminderit për vëmendjen tuaj në këtë çështje!”, shkroi Trump në Truth Social.
Burimi: botasot.info
