Holanda po përgatitet për një valë të re sanksionesh amerikane ndaj Gjykatës Penale Ndërkombëtare me seli në Hagë.
Kjo pasi administrata presidentit Donald Trump e akuzon gjykatën në fjalë se ka tejkaluar kompetencat, teksa synon që si lider i shtetit më të fuqishëm në botë, ta dobësojë funksionimin e saj.
Burime diplomatike dhe qeveritare në Hagë i thanë Associated Press se autoritetet holandeze janë njoftuar për masat e mundshme.
Holanda po shqyrton mënyra për ta mbajtur gjykatën funksionale, përfshirë pagat e stafit dhe mbrojtjen e dëshmitarëve. Në fokus është edhe funksionimi i qendrës së paraburgimit.
Uashingtoni ka sanksionuar tashmë mbi 12 zyrtarë aktualë dhe të mëparshëm të gjykatës.
Shtetet e Bashkuara dhe Izraeli kundërshtojnë urdhërarrestet që lëshon kjo Gjykatë ndaj zyrtarëve të lartë izraelitë, përfshirë kryeministrin Benjamin Netanyahu.
Uashingtoni ka kundërshtuar gjithashtu hetimet për veprimet e ushtrisë amerikane në Afganistan.
Sanksionet mund t’ia kufizojnë gjykatës qasjen në shërbime financiare dhe teknologjike. Ato mund ta vështirësojnë edhe pagesën e punonjësve amerikanë, raporton AP, transmeton KosovaPress.
Gjykata ka nisur të largohet nga shërbimet amerikane, duke kaluar te kompani evropiane. Ajo ka zëvendësuar produktet e Microsoftit me programe të një ofruesi gjerman.
Holanda dhe zyrtarët e gjykatës po kërkojnë një periudhë kalimtare gjashtëmujore para zbatimit të masave.
Gjykata Penale Ndërkombëtare u themelua në vitin 2002. Ajo trajton krime lufte, krime kundër njerëzimit, gjenocid dhe agresion.
Shtetet e Bashkuara, Rusia, Kina, India dhe Izraeli nuk janë anëtare të saj. Gjykata numëron aktualisht 125 shtete anëtare.
Burimi: botasot.info
