Kryeministri i Kanadasë, Justin Trudeau, ka thënë se protesta e kamionistëve që e ka paralizuar kryeqytetin Otava duhet të ndalet.
Ai tha se kanadezët janë “të tronditur dhe sinqerisht të neveritur” nga sjelljet e disa protestuesve të cilët dyshohet se kanë kryer akte vandale dhe sjellje që kanë të bëjnë me abuzim racor.
Drejtuesit e kamionëve kanë bllokuar Otavën me kamionët e tyre, çka ka bërë të shpallet gjendje e jashtëzakonshme në qytet, në protestën e tyre kundër rregullave të Kanadasë për vaksinën kundër COVID-19.
Për gati dy javë, qindra kamionë e kanë bllokuar qendrën e qytetit duke detyruar shumë biznese lokale që të mbyllen, shkruan BBC.
Kjo protestë ka shkaktuar pakënaqësi të mëdha edhe te qytetarët të cilët po pengohen nga zhurma e vazhdueshme e borive, megjithëse situata ishte pak më e qetë në këtë aspekt kur një gjykatës i Otavës vendosi që kamionistët nuk duhet t’i bien borive për 10 ditë.
Ndërsa protesta ka qenë kryesisht paqësore, policia në Otava ka thënë se është e shqetësuar për retorikën ekstremiste që vjen nga grupet e ekstremit të djathtë pjesëmarrëse në tubim.
Përpos abuzimeve racore dhe homofobike të raportuara në këtë protestë janë shfaqur edhe simbolet naziste.
