Republika Turke e Qipros Veriore (TRNC) kritikoi forcat paqeruajtëse të OKB-së për ndërhyrjen në punimet e ndërtimit të rrugës për të lidhur fshatin Pile në zonën neutrale me pjesën tjetër të TRNC-së, raporton Anadolu.
“Qëndrimi i njëanshëm dhe i papranueshëm i OKB-së ndaj palës turke qipriote jo vetëm që e bën të dyshimtë ekzistencën e OKB-së në vendin tonë, por edhe dëmton reputacionin dhe besueshmërinë e OKB-së”, thuhet në një deklaratë të Ministrisë së Jashtme të TRNC-së.
Ministria tha se trupat paqeruajtëse të OKB-së u përpoqën të pengonin ndërtimin e rrugës dhe se qëndrimi i tyre ishte “i papranueshëm”.
TRNC i bëri thirrje gjithashtu OKB-së që të ketë një qasje të barabartë si me TRNC-në, ashtu edhe me Administratën Greke të Qipros.
“Projekti i zgjerimit/përmirësimit të rrugës aktuale Pile – Yiğitler është përgatitur me qëllim që të sigurojë qasje të lehtë për banorët e Pilesë në tokat e tyre në rajonin Pile, duke promovuar zhvillimin ekonomik për komunitetin lokal dhe duke mundësuar kalimin në fshatin Pile pa u mbështetur në Zonat e Bazave Sovrane Britanike”, tha në një deklaratë të mëparshme ministri i Jashtëm i TRNC-së, Tahsin Ertuğruloğlu.
Ai theksoi se rruga ishte projektuar vetëm për arsye humanitare, për të lehtësuar aktivitetet e përditshme të turqve qipriotë në fshat.
Forcat paqeruajtëse të OKB-së ngritën blloqe betoni në vendin e ndërtimit për të parandaluar punimet në rrugë.
Për më tepër, ata parkuan automjetet e tyre në territorin e TRNC-së.
Si kundërpërgjigje, forcat e sigurisë së TRNC-së i larguan automjetet me buldozerë.
Zyrtarët thanë më vonë se puna e ndërtimit rifilloi pasi trupat e OKB-së u tërhoqën nga zona.
