Analisti dhe ish-ambasador i SHBA-së në Ukrainë, Steven Pifer thotë me bindje se Vladimir Putin “nuk do luftë bërthamore”, ndërsa ai dha njohuritë e tij mbi kërcënimin që Kremlini i kujton çdo ditë Perëndimit.
Ai tha se Moska thjesht “do që Ukraina dhe Perëndimi të besojnë se Rusia është gati për luftë bërthamore për t’i frikësuar ata”, raporton Sky News.
“Putini shpesh flet për armë bërthamore, edhe kur nuk kërcënon. Atij i pëlqen t’i kujtojë botës se Rusia ka shumë armë bërthamore. Ato përbëjnë pretendimin më të fortë të Rusisë për statusin e fuqisë së madhe dhe Putini dhe Kremlini kërkojnë të projektojnë imazhin e Rusisë si fuqi e madhe”, tha Pifer.
Ai shtoi se ndërkohë që bisedimet bërthamore janë të frikshme, udhëheqësit perëndimorë duhet të “konsiderojnë se çfarë ndodh nëse dorëzohen ndaj kërcënimeve të fshehura të Putinit”.
“Ai do të ketë marrë mësimin [e tij] dhe Perëndimi duhet të parashikojë më shumë kërcënime bërthamore nga Rusia. Për fat të mirë, udhëheqësit e SHBA dhe evropianë duket se e kuptojnë këtë.”
Pifer më pas përshkroi tre arsye “për të menduar se Rusia nuk do të përdorë armë bërthamore”.
Dhe sipas tij arsyet janë:
1- Nuk është e qartë se përdorimi i armëve bërthamore në Ukrainë do të kishte ndikim vendimtar ushtarak;
2 Pentagoni nuk sheh asnjë ndryshim në qëndrimin bërthamor të Rusisë;
3-Përdorimi bërthamor rus do të tjetërsonte Kinën, Indinë dhe Jugun Global.
Ndërkohë Presidenti i Shteteve të Bashkuara, Joe Biden, ka paralajmëruar Rusinë që të mos përdorë armë kimike apo armë taktike bërthamore në luftën në Ukrainë.
Gjatë një interviste për CBS News, Biden tha se veprime të tilla “do të ndryshonin luftën, ndryshe nga çdo gjë që nga Lufta e Dytë Botërore”.
Presidenti amerikan nuk tregoi se cila do të ishte përgjigja e SHBA-së nëse përdoren armë të tilla.
Presidenti rus, Vladimir Putin, ka vendosur në gatishmëri “speciale” forcat bërthamore ruse pas pushtimit të Ukrainës më 24 shkurt.
Ai u ka thënë shefave të tij të ushtrisë se kjo masë është ndërmarrë për shkak të “deklaratave agresive” nga Perëndimi.
Armët bërthamore ekzistojnë që 80 vjet dhe shumë shtete i shohin ato si mjet që garantojnë sigurinë e tyre kombëtare.
