Transportuesit privatë edhe sot vazhdojnë me bllokimin e komunikacionit në Shkup, por sipas paralajmërimeve, prej orës 10:00 sot në mëngjes, autobusë të tyre do të ketë vetëm në bul. “Ilinden”, ndërsa do t’i lirojnë për lëvizje udhëkryqet afër QT “Mavrovasja” dhe Kryqi i Kuq. Me rreth 200 autobusë të parkuar në këto tre pika transportuesit nga e hëna vendosën bllokada duke kërkuar pagesë të borxhit nga Qyteti i Shkupit dhe NPQ.
Marketing
Transportuesit dje në takim koordinues vendosën prej orës 10:00 t’i dislokojnë autobusët prej nga “Mavrovasja” dhe Kryqi i Kuq dhe të drejtohen në bul. “Ilinden”, në shtrirjen prej prapa Qeverisë drejt Karposhit deri tek “Alumina”. Shkak për debllokadat, siç thonë, është të bëhet presion më i madh ndaj Qytetit të Shkupit në mënyrë që t’u paguhet borxhi.
Duke u përgjigjur në pyetje të gazetarëve nëse do të kërkojnë sërish takim me autoritetet e qytetit, Kema Muriq nga “Slloboda prevoz” tha se Arsovska nuk ka ndër mend të bisedojë me ta, sepse, siç theksoi, nuk i ka argumentet. Paralajmëroi se do të kërkojnë ndihmë drejtpërdrejtë edhe nga kryeministri Dimitar Kovaçevski.
Nga Qyteti i Shkupit pardje kumtuan se do të shpallet konkurs i ri për transportuesit privat të autobusëve në linjat me numër 20 dhe 22.
Pushteti dhe opozita edhe dje dolën me akuza të ndërsjellta për kaosin në komunikacion të shkaktuar nga bllokadat e transportuesit privat.
Nga LSDM përmes kumtesës theksuan se tërheqja e pjesërishme e bllokadave në kryeqytet nuk do të thotë edhe zgjidhje për kolapsin në transportin publik në Shkup, të cilin, theksojnë, e krijoi VMRO-DPMNE-ja e paaftë.Kryetari i VMRO-DPMNE-së, Hristian Mickoski, ndërkaq, kërkoi që pushteti dhe kryesia e Qytetit të Shkupit të reflektojnë zgjidhje për problemet e transportuesve privat të autobusëve dhe të “ndalohet me politikën ndaj qytetarëve”. Paralajmëroi se VMRO-DPMNE do ta mbështetë çdo zgjidhje që është në interes të qytetarëve dhe të shkupjanëve.
