Një ngjarje tragjike ka ndodhur sot në qytetin e Prizrenit, ku një vajzë e mitur 15-vjeçare ka humbur jetën, ndërsa një tjetër 10-vjeçare ka mbetur e lënduar. Bazuar në të dhënat fillestare të hetimit, dyshohet se një shtetas turk, babai i familjes, ka privuar nga jeta vajzën e tij rreth moshës 15-vjeçare, duke përdorur një mjet të mprehtë – thikë. Sipas Kryeprokurorit të Prokurorisë Themelore në Prizren, Petrit Kryeziu, ngjarja ka ndodhur rreth orës 05:30 të mëngjesit të sotëm, raporton KosovaPress.
Ndërkaq, sipas Policisë, e njëjta ka qenë familje e rregullt që ka punuar, porse mbetet të shihet si ka ardhur situata deri tek ky incident.
Kryeprokurori Kryeziu ka konfirmuar se viktima është një vajzë 15-vjeçare, ndërsa vajza tjetër, 10 vjeç, ka marrë lëndime dhe është transportuar urgjentisht në Prishtinë për trajtim mjekësor.
Ngjarja ka ndodhur brenda familjes dhe sipas informacioneve fillestare, kryerësi i veprës penale është vetëlënduar. Autorët dhe viktimat nuk janë shtetas të Republikës së Kosovës, por shtetas të huaj që kanë banuar në këtë banesë për rreth gjashtë muaj. Sipas Kryeziut, familja nuk ka pasur ndonjë raport të mëparshëm për dhunë në familje apo ndonjë rast tjetër të ngjashëm.
“Ajo që mund të konfirmoj është se rasti ka ndodhur rreth orës 05:30 të mëngjesit. Në orët e hershme jemi njoftuar nga policia që ka ndodhur një rast i vrasjes. Mund të konfirmoj që e kemi një viktimë, person të vdekur është një vajzë e mitur 15 vjeçare, po ashtu kemi një vajzë tjetër të mitur 10 vjeçare që është e lënduar, gjithashtu edhe kryerësi i veprës penale është i vetëlënduar. Gjitha këto janë kryer me mjet të prehtë, me thikë. Është një rast shumë i rëndë, ka ndodhur brenda familjes. Nuk janë shtetas të Republikës së Kosovës, janë shtetas të huaj. Mund të konfirmoj që në bazë të informatave zyrtare, në këtë banesë ku ka ndodhur ngjarja, ata janë duke banuar që gjashtë muaj. Me siguri se kanë banuar edhe më herët, mirëpo faktikisht në Republikën e Kosovës, mirëpo këto janë informatat e para që i ka Prokuroria. Ajo që vlen të theksohet është fakti që nuk kemi pas të raportuar ndonjë rast, apo të ketë qenë në hetime për ndonjë rast, çfarëdo qoftë, as dhunë në familje apo tjetër për këta persona”, ka thënë Kryeziu.
Në anën tjetër, drejtori i Policisë në Prizren, Faton Aliu, konfirmoi se policia është njoftuar për ngjarjen dhe ka ofruar menjëherë ndihmën e parë mjekësore bashkë me emergjencën. Sipas tij, ka qenë familje e rregullt që ka punuar, do të shohim si ka ardhur situata deri tek ky incident.
Ai ka thënë se hetimet vazhdojnë për zbardhjen e plotë të ngjarjes dhe për të kuptuar arsyet që çuan në këtë incident tragjik.
“Ne jemi njoftuar si polici përmes telefonit. Policia ju ka përgjigj vendit të ngjarjes, ka provuar së bashku me emergjencën të ofrojë ndihmën e parë mjekësore. Mirëpo, viktima veç ka qenë me fatalitet, ndërsa dy viktimat tjera ju është ofruar tretman mjekësor. I dyshuari i cili po ashtu ka lëndime, është në mbikëqyrje policore. Mjeti me të cilin dyshohet se është kryer vepra, është në vendin e ngjarjes. Njësitë relevante janë në vendin e ngjarjes duke kryer veprimet në koordinim me Prokurorinë Themelore, prokurorin kompetent. Ne do të asistojmë dhe koordinojmë njësitë dhe punën me prokurori dhe tjerët me qëllim të zbardhjes së rrethanave tjera që kanë quar deri këtu. Në shënimet tona zyrtare, kjo familje nuk ka pas të iniciuar ndonjë rast të mëhershëm për ndonjë problem, ka qenë familje e rregullt që ka punuar, do të shohim si ka ardhur situata deri tek ky incident”, ka thënë Aliu.
Ndërkaq, Aliu ka thënë se vajza e mitur që ka pësuar lëndime, është transportuar për shkak të lëndimeve për Prishtinë, me shenja jete dhe mjeket do të kujdesen. Ndërkaq, ka nënvizuar se i dyshuari ka vetëlëndime, por sipas mjekeve është jashtë rrezikut për jetën.
“Vajza e mitur sipas njoftimeve është transportuar për shkak të lëndimeve për Prishtinë, me shenja jete, mjeket do të kujdesen. I dyshuari ka vetëlëndime, por sipas mjekeve është jashtë rrezikut për jetën”, ka shtuar Aliu.
Burimi: botasot.info
