U luajtën këtë fundjavë ndeshjet e javës së katërt të kampionatit të vajzave, teksa spikati derbi i kryeqytetit, Partizani – Tirana. Kjo sfidë përfundoi me shifrat 2-3 në favor të vajzave bardheblu, që arritën të merrnin 3 pikët në minutat shtesë të takimit me një gol të Rexhina Maxhalakut.
Një ndeshje vërtetë emocionuese, që pa vajzat e Partizanit të kalonin në fillim në avantazh, me një gol të Taullaj që në minutën e 10-të. Barazimi i rezultatit erdhi nga këmbët e Jehona Cokës në minutën e 30-të, teksa 7 minuta më vonë, realizoi edhe golin e epërsisë për vajzat bardheblu. Në fraksionin e dytë të lojës, Loci shënoi golin që baraspeshoi sfidën dhe kur gjithçka dukej se kishte mbaruar, Rexhina Maxhalaku gjeti golin që i dha tre pikët ekipit të saj.
Nga ana tjetër, Apolonia u rikthye te fitorja, pasi mundi me shifrat e thella 0-9 skuadrën e Laçit. Troka ishte pa dyshim protagonistja kryesore e kësaj ndeshje, me 6 gola të shënuar, teksa regjistruan emrin e tyre në këtë fitore edhe Hamonikaj, Mema e Ndoj. Aktualisht, fieraket janë në kuotën e 9 pikëve, po sa Tirana që ka një ndeshje më pak në kampionat.
Vllaznia vijon me ecurinë pozitive, teksa këtë të diel mundi Skënderbeun në shtëpi me rezultatin 6-0. Doçi e Bashka realizuan nga një dopietë në këtë sfidë, teksa rrugën e rrjetës e gjetën edhe Franja e Gjini. Në katër javë, kampionet në fuqi kanë marrë katër fitore, duke mos njohur humbje.
Teuta – Kinostudio ishte një tjetër sfidë e fortë e kësaj fundjave, e luajtur në Durrës. Kryeqytetaset morën fitoren e parë sezonale, në një ndeshje që prodhoi shumë gola e emocione për të dyja skuadrat. Skuadra e Kinostudios kaloi e para në avantazh me Baftian në minutën e 18-të, ndërsa në minutën e 23-të, Gashi realizoi edhe golin e dytë për kryeqytetaset. Bushi ngushtoi rezultatin pak minuta më vonë, teksa po në fraksionin e parë të lojës, Xhabafti e Kadiolli gjetën sërish rrugën e rrjetës. Pjesa e parë u mbyll me epërsinë e Kinostudios, 4-1, ndërsa gjatë fraksionit të dytë të lojës, Teuta zhvilloi një lojë spektakolare duke barazuar shifrat në harkun e 12 minutave me Malajn, Delilajn e Pucën. Megjithatë, nuk mungoi as kundërpërgjigjja e Kinostudios, që gjeti sërish avantazhin me Nickun e Gashin.
Sakaq, edhe Lushnja u mund në shtëpi nga Kukësi, që gjithashtu mori fitoren e parë këtë edicion. Katër gola të Rosela Vasës i dhanë fitoren ekipit verior, që është në kuotën e tre pikëve në kampionat në këtë sezon të ri.
Ndeshjet e javës së katërt në kampionatin e vajzave:
Partizani 2-3 Tirana
Skënderbeu 0-6 Vllaznia
KF Laçi 0-9 Apolonia
Teuta 4-6 Kinostudio
Lushnja 0-4 Kukësi
Renditja pas javës së katërt:
Vllaznia 12 pikë
Apolonia 9 pikë
Tirana 9 pikë
Partizani 6 pikë
Kukësi 3 pikë
KF Teuta 3 pikë
Kinostudio 3 pikë
Skënderbeu 3 pikë
Lushnja 0 pikë
KF Laçi 0 pikë
