Vetëm pak minuta pas konferencës për media të Arben Taravarit, në të cilën ai bëri të ditur largimin nga Qeveria dhe rikthimin, siç u shpreh ai, “tek populli”, ka reaguar me tone të ashpra zëvendëskryeministri i parë dhe njëri nga liderët e koalicionit VLEN, Izet Mexhiti.
Në një status të publikuar në facebook, Mexhiti e akuzon drejtpërdrejt Taravarin për tradhti, mashtrim dhe sabotim të ndryshimit që shqiptarët e Maqedonisë së Veriut e votuan. Pa kursyer aspak fjalët, ai thotë qartë:
“Ti nuk e solle ndryshimin. Ti e pengove ndryshimin.
Ti nuk po kthehesh tek populli. Ti po kthehesh tek lista e zezë.
Ti nuk po e braktis Qeverinë. Ti e tradhëtove Qeverinë.
Ti nuk e përfaqëson frymën e anëtarësisë së ASH-së. Ti e mashtrove anëtarësinë e ASH-së.
Ti nuk je heroi i kësaj historie. Ti je dëshpërimi i çdo shqiptari – intelektual apo i paarsimuar, punëtor ose afarist, burrë a grua – ti je zhgënjimi i secilit aktivist e simpatizant, i secilit shqiptar e shqiptare që e votoi dhe e mbështeti ndryshimin.”
Statusi në facebook i Mexhitit është një goditje e hapur ndaj vendimit të Taravarit, i cili, sipas tij, jo vetëm që nuk përfaqëson vullnetin e anëtarëve të Aleancës për Shqiptarët, por i ka lënë ata të mashtruar dhe pa orientim në mes të procesit të ndryshimit.
Në fund, Mexhiti përçoi një mesazh të qartë politik dhe mobilizues:
“VLEN vazhdon rrugën e ndryshimit. I ftojmë dhe mirëpresim me bujari të gjithë aktivistët, simpatizantët dhe votuesit që ndjehen të mashtruar, të tradhëtuar dhe të lënë në mes të rrugës pa orientim. Busulla politike e ndryshimit është VLEN. Ejani me ne!”
