Koreja e Veriut dhe ajo e Jugut, kanë lansuar për herë të parë raketa në ujërat e brigjeve të njëra-tjetrës. Seuli në një farë forme u hakmor të mërkurën, vetëm tri orë pasi Pheniani lansoi një raketë që ra më pak se 60 kilometra nga qyteti Sokcho në jug të vendit.
Në anën tjetër, Cheong Seong-chang, analist ushtarak nga Instituti Sejong në Korenë e Jugut, ka thënë për AFP se lansimi i sotëm i raketave “është demonstrimi më agresiv i armatosur” kundër Koresë së Jugut që nga viti 2010”.
“Situata tani është e rrezikshme dhe jostabile, mund të çojë deri te konflikti i armatosur”, shtoi analisti ushtarak. E situatën e tensionuar në rajon e komentoi edhe kryeministri japonez Fumio Kishida, i cili theksoi para gazetarëve se lansimi i raketave nga Koreja e Veriut është kërcënim i drejtpërdrejtë.
Ai gjithashtu bëri thirrje për një takim urgjent të Këshillit Nacional për Siguri, si pasojë e rritjes së tensioneve në Gadishullin Korean. Yaukazu Hamada, ministri japonez i Mbrojtjes, tha se sot Koreja e Veriu lansoi të paktën dy raketa që ranë jashtë zonës ekskluzive ekonomike të Japonisë.
