Pas më shumë se 26 vjetëve nga lufta në Kosovë, janë gjetur mbetjet mortore të 10 viktimave që ishin në listën e personave të zhdukur.
Sot në Grabanicë e Jashanicë të Klinës u rivarrosën me nderime mbetjet mortore të tetë personave të gjetur së fundmi në Bishtazhin të Gjakovës.
Familjarët ndër dhimbje e emocione flasin për më të dashurit e tyre për fatin e të cilëve nuk kishin dijeni që nga koha e zhdukjes së tyre me forcë nga kriminelët serbë.
Pasi i kemi gjetur eshtrat është një lehtësim, të paktën ta dimë varrin dhe ku po e lëmë, thotë familjari i Sheremet Ismajlit, njërit ndër martirët që u rivarrosën sot në Grabanicë të Klinës.
Shaban Ismajli, djali i axhës së martirit Sheremet Ismajli thotë se gjithmonë kanë qëndruar me shpresë se një ditë do të dihet për fatin e familjarit të tyre.
Ai shprehet se ndihet i lehtësuar pasi tashmë e di varrin e Sheremetit, i cili ishte rreth moshës 40-vjeç kur u zhduk me dhunë nga forcat kriminale serbe, për të mos u gjetur deri më tash.
Ismajli tha se nuk duhet harruar gjaku që është derdhur për lirinë e Kosovës dhe se duhet vazhduar përpara deri në gjetjen e të gjithë personave të zhdukur.
Ismajli: Duhet t’i gjejmë edhe personat e tjerë të zhdukur gjatë luftës në Kosovë
“Atë gjak nuk duhet ta harrojmë se ata na e kanë sjellë lirinë. Atyre u qoftë lavdi, kanë lënë histori të pasur. Ne atë histori nuk duhet ta harrojmë. Sa e rëndësishme është për juve kjo ditë? Kjo është e arritur e madhe, por është një gjenocid i madh, ka ende të pagjetur. Duhet t’i gjejmë edhe ata që nuk janë gjetur. Por, pasi i kemi gjetur eshtrat është një lehtësim, bile ta dimë varrin dhe ku po e lëmë. A keni pasur shpresë deri sot? Gjithmonë me shpresë dhe ngarkesë kemi qenë, jo veç ne. Por, shumë prindërve u kanë shkuar (vdekur) fëmijët, me nga 6-vjeç, 6 muaj. Është shumë e rëndë”, tha Ismajli.
Sot, bashkë me martirin Sheremet Ismajlin në Kompleksin Memorial “Kodra e Kuqe” në Grabanicë të Klinës, me ceremoni ushtarake u rivarrosën edhe Adem (Hazir) Gashi, Sahit (Ahmet) Gashi, Bekim (Hashim) Hasani, Osman (Kadri) Fejza, Shkelzen (Rifat) Hajdaraj dhe Bekim (Muharrem) Gashi. Ndërkaq, në varrezat e fshatit Jashanicë në Klinë, u rivarros martiri Mentor (Xhemajl) Myrtaj.
Edhe 26 vjet pas përfundimit të luftës në Kosovës nuk dihet për fatin e mbi 1600 personave të zhdukur.
Burimi: botasot.info
