Jyrgen Klop këmbëngul përpara transfertës me Totenhemin se dueli i së dielës është shumë i rëndësishëm për të ardhmen e Liverpulit të tij, që vjen pas dy humbjeve radhazi në kampionat, kundër Notingemit dhe Lidsit.
“Reds”- at renditen -15 pikë larg kryesuesve të Arsenalit, duke vënë në dyshim renditjen e tyre në 4 vendet e para. Ata u rikthyen me një fitore 2-0 ndaj Napolit në Champions, por trajneri gjerman tha në konferencë se transferta me skuadrën e Kontes do të jetë vendimtare, ndërsa Anglia do të luajë edhe dy javë përpara ndërprerjes së kampionatit për Botërorin.
“Është një ndeshje shumë e vështirë për ne dhe e rëndësishme. Luajmë kundër Totenhemit në transfertë.
Nuk i kam numëruar pikët, por ne nuk mund të tregohemi selektivë me kundërshtarët.
Ne duhet të hyjmë në çdo ndeshje për të fituar. Ata vijnë pas një ndeshje të fundit shumë të rëndësishme dhe ne jemi gati për një kundërshtar me vetëbesim dhe të fortë”, deklaroi Klop.
