Të hënën mbrëma, hyrja e një burgu në Toulon u qëllua me një armë automatike, ndërsa automjetet u dogjën në parkingjet e disa burgjeve, sipas raportimeve dhe postimeve të ndryshme të mediave franceze të shpërndara në rrjetet sociale.
Përveç Toulon, burgjet thuhet se ishin në shënjestër në Aix-en-Provence dhe Marseille, Valence dhe Nîmes, Luynes, Nanterre dhe Villepinte.
Ministri i Drejtësisë i Francës, Gérald Darmanin shkroi në një postim në X se burgjet ishin përballur me “përpjekje frikësimi”, dhe tha se ai do të shkonte në Toulon për të mbështetur oficerët e prekur.
“Republika Franceze po përballet me problemin e trafikut të drogës dhe po merr masa që do të përçajnë masivisht rrjetet kriminale”, shtoi ai.
Një burim i afërt me rastin tha për mediat franceze se sulmet dukej se ishin të koordinuara, dhe “të lidhura qartë me strategjinë e ministrit kundër narkobanditizmit”.
Qeveria franceze në shkurt nisi një fushatë të re kundër trafikut të drogës, duke u zotuar të trajtojë dhunën në rritje të bandave dhe vdekjet e lidhura me importet në rritje të kokainës.
Në një postim në X të martën, sindikata e rojeve të burgut të Francës, ndau “shqetësimin dhe zemërimin më të thellë” pas sulmeve “jashtëzakonisht të rënda” gjatë natës.
Ministri i Brendshëm, Bruno Retailleau u ka kërkuar administratave lokale në Francë që “të forcojnë menjëherë mbrojtjen e oficerëve dhe institucioneve” pas sulmeve.
“Përgjigja e shtetit duhet të jetë e pamëshirshme. Ata që sulmojnë burgjet dhe oficerët e tyre meritojnë të mbyllen në ato burgje dhe të monitorohen nga ata oficerë”, shkroi ai në X.
Burimi: botasot.info
