Një person është arrestuar nga Policia e Kosovës në Vushtrri pas një incidenti të rëndë që ndodhi dje pasdite, ku një qytetar u sulmua fizikisht dhe ndaj tij u shtie me armë zjarri.
Ngjarja dyshohet të ketë ndodhur pas një mosmarrëveshjeje rreth çështjeve të transportit të grurit.
Sipas Policisë, i dyshuari mashkull kosovar, së bashku me dy persona të tjerë ende të paidentifikuar, kanë sulmuar fizikisht viktimën, duke i shkaktuar lëndime trupore. Gjatë incidentit, njëri nga të dyshuarit ka shtënë edhe me armë zjarri.
Viktimës i është ofruar tretman mjekësor, ndërsa në vendin e ngjarjes njësitet policore kanë gjetur dhe konfiskuar një pistoletë me karikator dhe dy gëzhoja.
Me urdhër të prokurorit të rastit, i dyshuari është ndaluar në mbajtje, ndërsa dy të dyshuarit tjerë janë ende në arrati dhe janë në kërkim nga Policia.
Hetimet lidhur me rastin janë duke vazhduar.
Burimi: botasot.info
