Stuttgart-Darmstad çelën javën e pestë të Bundesliga, me vendasit që pas fitores 3-1 ngjiten në krye të renditjes, ndërsa miqtë nga ana tjetër nuk po dinë të dalin nga kriza dhe vijojnë të jenë në fund të renditjes.
Lojtari i kombëtares shqiptare, Klaus Gjasula e nisi këtë takim si titullar, duke u rikthyer pas disa javësh në formacionin e Darmstadt, megjithatë ekipi i tij doli pa pikë nga “MHP Arena”.
Miqtë morën avantazhin në minutën e 17’ pas autogolit të Zagadou, megjithatë gëzimi i Darmstadt zgjati deri në minutën e 22’, moment në të cilin Millot barazoi për vendasit.
10 minuta më pas rrugën drejt rrjetës e gjeti Guirassy, i cili përmbysi rezultatin.
Vendasit diktuan ritmin edhe në fraksionin e dytë dhe gjetën rrugën drejt rrjetës me Fuhrich, por ai gol u anulua pas verifikimit në VAR për pozicion të parregullt.
Në fund rezultati u vulos nga Guirassy, i cili realizoi golin e tretë për Stuttgart në minutën e 90+2’.
Pas javës së pestë të Bundesliga Stuttgart merr përkohësisht kreun me 12 pikë, por me skuadrat e tjera që ende se kanë luajtur takimin e këtij raundi.
Ndërsa Darmstadt nga ana tjetër vuan në fund të renditjes me vetëm një pikë në pesë ndeshje.
