Një incident i pazakontë është raportuar sot në ambientet e Shkollës Fillore “Hasan Prishtina” në Prishtinë, ku një nxënëse e mitur është kapur me një sprej lotsjellës (AC) në çantën e saj.
Rasti ka ndodhur rreth orës 14:00, kur në klasë është ndjerë aroma e sprejit dhe sigurimi i shkollës ka ndërhyrë duke e gjetur mjetin e dyshuar. Pas njoftimit, njësitet policore kanë shkuar në lokacion dhe kanë identifikuar nxënësen A.K., e lindur në vitin 2009.
E mitura ka deklaruar se sprejin e kishte gjetur në tokë dhe e kishte marrë me vete vetëm për t’ua treguar shoqeve të saj. Megjithatë, mjeti është konfiskuar nga policia, ndërsa e dyshuara është intervistuar në prani të prindit.
Për rastin është informuar edhe Prokurori Kujdestar për të Mitur, i cili ka udhëzuar që rasti të iniciohet dhe t’i referohet hetimeve për veprën penale “Mbajtje në pronësi, kontroll ose posedim të paautorizuar të armëve”.
Burimi: botasot.info
