Ministri Oliver Spasovski, në vizitën e sotme në Sitel, i pyetur se deri ku është bërë hetimi për raportimet e rreme për bomba të vendosura në shkollat e mesme të Shkupit, ai tha se mesazhet janë dërguar nga jashtë, përcjellë Telegrafi.
“Mesazhet janë dërguar nga jashtë vendit. Kemi indicie serioze se si po zhvillohet i gjithë procesi dhe në atë pjesë realisht po punohet me përkushtim maksimal, me ndihmën e partnerëve tanë, me qëllim që të ndalohen këto akte monstruoze që shkaktojnë ankth te qytetarët”, tha ministri Spasovski.
Ai theksoi se të gjitha kapacitetet e shërbimeve të sigurisë, që nga fillimi i mandatit të kësaj kryesie të MPB-së, i dedikohen mbrojtjes serioze të të gjithë qytetarëve të shtetit në të gjitha segmentet përfshirë këtu edhe sigurinë kibernetike, e cila në ditët e sotme kushtet janë jashtëzakonisht të spikatura.
“Ju e dini se ka pasur tentativa për të sulmuar institucionet, sulme hakeri në disa institucione në vend. Edhe gjatë zbatimit të regjistrimit, ka pasur një sulm të rëndë hakeri në të gjithë sistemin që praktikisht punonte në pjesën e zbatimit të regjistrimit, në disa ministri etj. Vetëm tregon se sa është e nevojshme të merren të gjitha masat në fushën e sigurisë kibernetike dhe të rritet ajo siguri kibernetike duke i forcuar kapacitetet materialo-teknike, por edhe resurset njerëzore”, tha Spasovski.
