Ambasada e Francës dhe Instituti Francez njoftojnë se sot në ora 19:00, në teatrin ODA do të hapet edicioni i 25-të i Javës së Frankofonisë. Kjo ngjarje tradicionale do të shënojë fillimin e një jave të mbushur me aktivitete të pasura kulturore, muzikore dhe edukative.
‘Nga data 22 mars, aktivitetet do të zhvendosen në Kryeqendrën e Frankofonisë për vitin 2025, e cila këtë vit është qyteti i Gjakovës. Ky edicion do të ofrojë një program të pasur, duke përfshirë vallezim, koncerte, filma, teatër dhe shumë aktivitete tjera kulturore dhe edukative, që do të sjellin një atmosferë të veçantë për të gjithë ata që do të jenë pjesë e këtij eventi “, njofton Ambasada e Francës.
Ky program është realizuar në bashkëpunim me ambasadat e tjera frankofone, si ato të Zvicrës dhe Belgjikës, si dhe me një bashkëpunim të jashtëzakonshëm me Komunën e Gjakovës.
Ambasada e Francës dhe Instituti Francez ftojnë të gjithë qytetarët dhe miqtë e kulturës frankofone të bashkohen me ne për këtë ngjarje të veçantë.
Burimi: botasot.info
