Sony gjithnjë e ka përdorur ekspertizën me kamerat për të krijuar një smartfon flagship dhe të njëjtën gjë ka bërë me flagshipin e ri Xperia 1 IV.
Kompania thotë se është smartfoni i parë në botë me një lente optike 85-125mm e aftë të regjistrojë video 4K me 120fps. Smartfoni fuqizohet nga çipi Snapdragon 8 Gen 1.
Tipari dallues i këtij smartfoni është lentja zmadhuese e 85-125mm e cila mund të realizojë fotografi për evente sportive apo edhe botën e egër.
Për ndërtimin e saj Sony ka përdorur një sistem periskopi 90-gradësh siç ka vepruar Huawei me P30 Pro.
Mbi lentën e zmadhimit janë dy lente 16mm dhe 24mm së bashku me një sensor ToF. Të tre kamerat përdorin sensorin 12-megapiksel Exmor RS.
Disa prej funksionaliteteve të kësaj kamere janë gjurmimi i syrit në kohë reale, gjurmimi i objekteve dhe sistemi Optical SteadyShot.
Sony premton saktësi të lartë në balancën e ngjyrës së bardhë. Edhe kamera ballore ka një sensor 12-megapiksel Exmor RS.
Por kompania thotë se Xperia 1 IV nuk shkëlqen vetëm në fotografi por edhe video lojëra falë ekranit 120Hz HDR 6.5-inç OLED dhe procesorit Snapdragon 8 Gen 1.
Smartfoni ka rezistencë ndaj ujit IP65/68, xham Gorilla Glass Victus, 5G 6Ghz/mmWave, Wi-Fi 6E, 12GB RAM dhe 512GB memorie të brendshme.
Bateria prej 5,000 mAh karikohet në 50% për 30 minuta përmes teknologjisë wireless. Xperia 1 IV del në shitje më 1 Shtator për 1,600 dollarë. /PCWorld Albanian
