Agjencia Kombëtare kundër Krimit e Sllovakisë (NAKA) ka akuzuar disa oficerë të inteligjencës dhe zbatimit të ligjit për korrupsion, veprim ky i cili ka tronditur skenën politike të vendit, njoftuan mediat lokale, transmeton Anadolu.
Në mesin e të akuzuarve janë krerët e Shërbimit Informativ të Sllovakisë (SIS) dhe Byrosë së Sigurisë Kombëtare (NSB), njoftoi agjencia shtetërore e lajmeve TASR, duke shtuar se të premten do të mblidhet Këshilli i Sigurisë Kombëtare për të shqyrtuar çështjen.
Gjithsej shtatë oficerë të lartë të policisë dhe inteligjencës akuzohen për shpërdorim të pushtetit dhe konspiracion kriminal nga NAKA, shton agjencia.
Sipas rastit të parë, që ka të bëjë me pesë oficerë, ata synonin të pengonin hetimet për korrupsion dhe krime të tjera duke u përpjekur të krijojnë përshtypjen e manipulimit të deklaratave të dëshmitarëve nga hetuesit dhe gjithashtu për të diskredituar autoritetet e zbatimit të ligjit.
Në rastin e dytë, dy oficerë akuzohen për shpërdorim të autoritetit të detyrës publike për hakmarrje.
Partia opozitare Drejtimi-Socialdemokrat (Smer-SD) e quajti lëvizjen e NAKA-s një grusht shteti policor që ka për qëllim likuidimin e opozitës dhe kërkoi shkarkimin nga detyra të shefit të policisë Stefan Hamran.
Partia Zëri-Socialdemokrat (HLAS-SD) tha se akuzat kundër oficerëve gjashtë javë përpara zgjedhjeve kanë për qëllim manipulimin e rezultateve.
