Skënderbeu u përpoq të rivalizonte Tiranën në Kupën e Shqipërisë me të gjitha mënyrat, por mungesa e disa titullarëve që nuk janë rikthyer ende pas festave të fundvitit u reflektua qartë në lojën e korçarëve.
Këto boshllëqe u ndjenë dukshëm gjatë përballjes së Kupës dhe vijojnë të mbeten një shqetësim serioz edhe në prag të rikthimit të kampionatit.
Mangësitë në organikë po e shoqërojnë Skënderbeun edhe në përgatitjet për ndeshjen e javës së 18-të të Kategorisë së Parë, ku skuadra e Ernest Gjokës pret Luftëtarin në Korçë. Përgatitjet për turin e tretë të Kupës, korçarët i zhvilluan në rezidencën e klubit në Durrës, përpara përballjes me bardheblutë. Pas kthimit nga kryeqyteti, ku u eliminuan nga Tirana pas 120 minutash lojë, Skënderbeu ka rifilluar stërvitjet në Korçë. Skuadra, nën drejtimin e stafit teknik, zhvilloi seancën stërvitore gjatë paradites së djeshme.
Pavarësisht temperaturave disa gradë nën zero, kjo nuk i pengoi futbollistët të zhvillonin një proces stërvitor të plotë dhe me intensitet. Megjithatë, situata mbetet shqetësuese sa i përket katër futbollistëve të huaj, Luka Vasquez,
Randi Dumfur, Baba Musa dhe Saleh Nasr. Asnjëri prej tyre nuk është bashkuar ende me ekipin, ndërsa sipas komunikimeve me drejtuesit e klubit, nuk ka një datë të saktë për mbërritjen e tyre.
Gjithçka varet nga procedurat burokratike dhe pajisja me viza nga ambasadat përkatëse. Bëhet fjalë për lojtarë titullarë, mungesa e të cilëve ndikon drejtpërdrejt në forcën dhe ekuilibrin e skuadrës.
Gjasat janë që Skënderbeu të mos jetë i plotë as në përballjen e fundjavës ndaj Luftëtarit.
Pavarësisht këtyre problemeve, 17 javët e para të kampionatit janë mbyllur me dominimin e Skënderbeut, që kryeson renditjen me 40 pikë, 7 më shumë se Laçi i vendit të dytë dhe 8 pikë më shumë se Pogradeci i vendit të tretë, duke konfirmuar ambiciet për rikthim të shpejtë në elitë.
Skënderbeu e ka nisur me qetësi merkaton e janarit, për sa kohë nuk flitet për largime nga Korça.
Gjithsesi, në vijim pritet të ketë edhe zhvillime, ku daljet do të jenë me formulën e huazimit. Prurjet parashikohen te vijnë nga tregu i huaj dhe behet fjalë për lojtarë me moshë të re dhe të perspektivës, të cilët mund të shiten më vonë.
Burimi: botasot.info
