Kryetarja e Komisionit për Antikorrupsion si duket po ngatëron profesionin, vendin dhe kohën për të komentuar zgjedhjen e një prokurori shqiptar në krye të Prokurorisë për Krim të Organizuar dhe Korrupsion, për faktin se zgjedhja e tij është bë në mënyrë të rregullt, të ligjshme dhe pa asnjë ndikim e në mënyrë demokratike nga votimi në të gjitha Prokuroritë në vend nga ana e prokurorëve me të drejtë vote.
Zgjedhja e një shqiptari duket se ka turbulluar ujërat në opinionin vendor e posaçërisht tek ai maqedonas pasiqë për herë të parë në krye të saj vjen një shqiptar me përvojë në Prokurori.
Madje, Ivanovska me këtë rast harron se Antikorrupsioni në këtë rast nuk ka asnjë kompetencë dhe nuk ka asnjë vendim nga komisioni, por i komenton zgjedhjet në Prokurorinë për Ndjekjen e Krimit të Organizuar dhe Korrupsionit.
Po çfarë komenton Ivanovska më tej, ju sjellim deklaratat e saj në vazhdim:
Komisioni Shtetëror për Parandalimin e Korrupsionit ka rezerva për mënyrën se si është përzgjedhur shefi i Prokurorisë Themelore Publike për Ndjekjen e Krimit të Organizuar dhe Korrupsionit, tha sot kryetarja e Komisionit, Biljana Ivanovska, duke theksuar se ajo që në fotot publike të kreut të ri të Prokurorisë, Islam Abazi me njerëzit e parë të BDI-së, lë hapësirë për të besuar se “ka pasur ndikim”.
– Të shpresojmë që kreu i ri i Prokurorisë t’i qëndrojë në rrugë krimit dhe korrupsionit, por sigurisht që kemi rezerva për mënyrën se si u zgjodh. Gjithmonë janë kërkuar disa mekanizma për përzgjedhje më të mirë, këtu tani është dhënë mundësia që të gjithë prokurorët të votojnë në mënyrë demokratike dhe kjo është në rregull. Nga ana tjetër, për mendimin tim, kriteret për cilësinë e notave të dhëna nga Këshilli i Prokurorëve Publikë dhe Programi i Punës janë harruar dhe të gjitha këto janë elemente që do të jepnin një pasqyrë më të qartë se kush është personi, çfarë lloj formimi që ka në jetën e tij profesionale si pjesë e punës. Në këtë mënyrë fotografia do të ishte më e plotë për ne, tha Ivanovska.
Thotë se nuk mund të thonë nëse dikush u ka imponuar prokurorëve se si të votojnë, por siç tha ajo, në mungesë të disa kritereve ka vend për të menduar se ka pasur ndonjë ndikim.
– Në mungesë të gjithë këtyre gjërave që rendita, mbetën fotot me njerëz të afërt në parti, gjë që lë vend për të besuar se ka pasur ndonjë ndikim. Nëse është njeri me integritet, mund të luftojë dhe të provojë se është ai që do të rregullojë Prokurorinë. Në fakt duhet t’i japim hapësirë, por tabloja e deritanishme nuk është e favorshme. Ai duhet të investojë më shumë energji për të dëshmuar se ka integritet dhe ka energji për të luftuar korrupsionin – tha Ivanovska.
E pyetur nëse do të reagojë për mungesën e kritereve që ajo ka treguar, Ivanovska tha se sigurisht që po bëjnë një kontroll anti-korrupsion të legjislacionit.
“Ne kemi përgatitur edhe disa vërejtje lidhur me ligjin, tani nuk ka çfarë të reagojmë sepse gjithçka është sipas ligjit, por do të reagojmë në drejtim të përmirësimit të kritereve për zgjedhjen e prokurorit publik, personit të parë në këtë prokurori sepse kjo është vendimtare. Ajo duhet të jetë një kundërvënie e asaj që ka qenë PSP, diçka që duhet të zbatojë realisht të gjitha rastet që ngrihen për korrupsion të lartë. Na duhet energji e re që do të jetë vendimtare – thekson Ivanovska.
