Po bëhet gjithnjë e më e qartë se Viktor Dimovski nuk do shkojë në Paris si ambasador. Kandidatura e tij për këtë pozitë u vu në pikëpyetje pasi Agjencia e Sigurisë Kombëtare i aprovoi shtetësinë biznesmenit kontrovers pro-rus Oleksandër Onishçenko, ndërsa Dimovski ishte drejtor i institucionit. Kryetari i Komisionit parlamentar për politikë të jashtme, Antonio Milloshoski, pret që kandidati i ardhshëm për në Francë të jetë diplomat i karrierës.
“Ajo që kemi si informacion jozyrtar nga MPJ është se presidenti Pendarovski dhe ministri i Punëve të Jashtme tashmë janë marrë vesh që Viktor Dimovski të mos jetë ambasador i Maqedonisë në Paris. Por nëse ata kanë marrë vendim se kush duhet të jetë ambasadori i ardhshëm, ne nuk kemi informacion për këtë”, deklaroi Antonio Milloshoski – kryetar i Komisionit për Politikë të Jashtme.
Në komisionin parlamentar janë dëgjuar ish-ministri i vetëqeverisjes lokale, Goran Milevski, i cili shkon si ambasador në Lubjanë dhe ish-ministrin pa portofol Edmond Ademi, i cili do të kryejë postin e ambasadorit në Spanjë, shteti i radhës që do ta ketë presidencën e Bashkimit Evropian.
“Ajo që mungon është mbajtja e një seance të përbashkët mes dy qeverive, siç bën Qeveria e Maqedonisë së Veriut me vendet fqinje. Mendoj se me Slloveninë do të jetë jashtëzakonisht e rëndësishme të bëjmë një seancë të tillë për kontributin që ka Sllovenia në mbështetjen dhe lobimin tonë në nivel ndërkombëtar”, tha Goran Milevski – kandidat për ambasador në Slloveni.
“Nëse ju si ambasador vazhdoni edhe në dy vitet e ardhshme të keni vetëm një diplomat dhe një sekretare, atëherë nuk besoj se një pjesë e këtyre planeve tuaja të mëdha ambicioze do të realizohen”, u shpreh Antonio Milloshoski – deputet.
“Për vendin tonë, presidenca e Spanjës me Këshillin e BE-së do të jetë kyçe në gjysmën e dytë të vitit, kur pritet të përfundojë skriningu dhe të hapen kllasterët e parë në negociatat e anëtarësimit në BE. Gjatë presidencës spanjolle me BE-në janë planifikuar rreth 22 takime dhe samite ministrore”, theksoi Edmond Ademi – kandidat për ambasador në Spanjë.
Ndryshe, nga MPJ për “Alsat” thonë se mbeten të paplotësuara pozitat e ambasadorëve në Paris, Varshavë, Londër, Bukuresht, Budapest, Sarajevë, Berlin, Pekin, Brasilia, Beograd, Kajro, Tel Aviv, ndërsa nga nesër zyrtarisht nuk do të kemi ambasador në Kiev, Ukrainë.
