Në nder të Ditës së Shkollës, nxënësit e shkollës fillore “Abdullah Shabani” kanë organizuar panair shkollor dhe një program artistik në Qendrën e Kulturës “Rexhep Mitrovica”.
Në këtë panair, nxënësit ekspozuan punimet e tyre të përgatitura në lëndë të ndryshme, duke shfaqur talentin, kreativitetin dhe njohuritë e tyre, shkruan Telegrafi.
Nga punime artizanale dhe vizatime, deri te projekte inovative shkencore dhe dorëshkrime të ndryshme, çdo stendë tregonte një histori unike të punës dhe përkushtimit të tyre.
“Pjesë e kësaj ngjarjeje ishte edhe programi artistik, ku nxënësit performuan shfaqje të mrekullueshme, duke dhuruar emocione dhe entuziazëm tek të pranishmit”, thuhet në njoftim.
Në këtë aktivitet morën pjesë drejtoresha e DKA-së, Drita Kadriu, dhe drejtori i Drejtorisë për Shëndetësi, Fahri Shabani, të cilët përgëzuan stafin e shkollës dhe nxënësit për organizimin e suksesshëm, duke theksuar rëndësinë e aktiviteteve të tilla që nxisin kreativitetin dhe bashkëpunimin në mesin e të rinjve.
“Ky panair ishte një dëshmi e punës dhe përkushtimit të nxënësve dhe mësimdhënësve, duke e kthyer këtë ditë në një festë të dijes dhe artit”, thuhet tutje në njoftim.
Burimi: botasot.info
