Aktori i njohur i Hollywood-it, Shia LaBeouf, është arrestuar në orët e para të së martës pas një përplasjeje fizike të dyshuar gjatë festimeve të Mardi Gras në New Orleans, raportoi Variety.
Sipas raportimeve, aktori i filmit “Transformers” u përfshi në një incident pak pas mesnate, jashtë një bari në zonën French Quarter. Gjatë ngjarjes ai mori ndihmë mjekësore nga ekipet e emergjencës.
Sipas TMZ, një dëshmitar ka deklaruar se LaBeouf ishte nxjerrë nga një bar aty pranë për arsye ende të panjohura, ndërsa përleshja e dyshuar ndodhi më pas. Dokumentet gjyqësore tregojnë se aktori përballet me dy akuza për dhunë të lehtë.
LaBeouf ka pasur edhe më herët probleme me ligjin dhe sjellje të paqëndrueshme. Ndër rastet më të përfolura ishte padia e ngritur ndaj tij nga këngëtarja FKA Twigs, e cila e akuzonte për dhunë seksuale, sulm dhe shkaktim të stresit emocional. Çështja u mbyll me marrëveshje korrikun e vitit të kaluar.
Më herët, në vitin 2017, aktori ishte urdhëruar nga gjykata të ndiqte një program rehabilitimi pas arrestimit në Georgia për dehje në publik dhe sjellje të çrregullt.
Në vitin 2025, LaBeouf u shfaq në dokumentarin “Slauson Rec” të regjisorit Leo Lewis O’Neil, i cili ndjek aktivitetin e tij në një kompani eksperimentale teatri. Filmi, i shfaqur në Festivalin e Filmit në Kanë, e paraqet aktorin duke debatuar me aktorët dhe stafin, duke nxitur përplasje fizike dhe duke shfaqur sjellje agresive.
Kritiku i filmit Owen Gleiberman e përshkroi dokumentarin si një projekt që tregon LaBeouf në rolin e një mentori aktrimi, por që më pas shfaq një sjellje gjithnjë e më të ashpër dhe problematike.
Burimi: botasot.info
