Ambasadori rus: Mojtaba Khamenei nuk ndodhet në Moskë, por në Iran

Rusia ka komentuar mbi vendndodhjen e udhëheqësit të ri suprem të Iranit, Ajatollah Mojtaba Khamenei, duke thënë se ai ndodhej në Iran.

I pyetur për vendndodhjen e Khameneit mes thashethemeve se udhëheqësi iranian mund të jetë evakuuar në Moskë, ambasadori i Rusisë në Iran, Alexey Dedov, tha: “Siç e ka deklaruar vazhdimisht udhëheqja iraniane, udhëheqësi i ri është në Iran, por për arsye të dukshme, ai po përmbahet nga paraqitjet publike.”

Kremlini më parë kishte refuzuar të komentonte mbi vendndodhjen e Khameneit, shkruan CNN.

Më shumë se tre javë pas emërimit të tij si udhëheqës suprem i Iranit, Khamenei ende nuk është parë ose dëgjuar në publik.

Khamenei u plagos në sulmin që vrau babain e tij dhe komandantët më të lartë ushtarakë të Iranit. Ai kishte pësuar një thyerje në këmbë, një mavijosje në syrin e majtë dhe gërvishtje të vogla në fytyrë.

Sekretari i Mbrojtjes i SHBA-së, Pete Hegseth, tha më parë se Khamenei “ka të ngjarë të jetë shpërfytyruar”, pa dhënë asnjë provë.