Ministri turk i Mbrojtjes Kombëtare, Yaşar Güler, zhvilloi bisedë telefonike të hënën vonë me homologun e tij amerikan Lloyd Austin në lidhje me “qëllimet e përbashkëta dypalëshe dhe shumëpalëshe të mbrojtjes”, njoftoi Departamenti amerikan i Mbrojtjes, transmeton Anadolu.
“Sekretari Austin dhe ministri Güler vlerësuan historinë e gjatë të bashkëpunimit ushtarak midis Shteteve të Bashkuara dhe Türkiyes dhe përshëndetën bashkëpunimin tonë të vazhdueshëm të ngushtë”, thuhet në komunikatën lidhur me bisedën telefonike.
“Ata diskutuan gjithashtu bisedimet pozitive midis Türkiyes, Suedisë dhe Sekretarit të Përgjithshëm të NATO-s (Jens) Stoltenberg, si dhe mbështetjen e Departamentit të Mbrojtjes për modernizimin ushtarak të Türkiyes”, thuhet më tej.
Telefonata erdhi pasi presidenti turk Recep Tayyip Erdoğan ra dakord të dërgojë protokollin e pranimit të Suedisë në NATO në parlament pas një takimi trepalësh me Stoltenbergun dhe kryeministrin suedez Ulf Kristersson përpara samitit të NATO-s në Vilnius të Lituanisë, i cili do të mbahet sot dhe nesër.
Ankaraja kërkoi avionë luftarakë F-16 dhe komplete modernizimi nga SHBA-ja në tetor 2021. Marrëveshja prej 6 miliardë dollarësh do të përfshinte shitjen e 40 avionëve si dhe kompletet e modernizimit për 79 avionë luftarakë tashmë në inventarin e Forcave Ajrore Turke.
Megjithëse administrata e presidentit Joe Biden ka thënë në mënyrë të përsëritur se dëshiron të ecë përpara me shitjen e avionëve F-16 Türkiyes, disa ligjvënës në Kongresin amerikan janë zotuar të anulojnë marrëveshjen për disa kërkesa, duke përfshirë kushtëzimin e blerjes me miratimin e anëtarësimit të Suedisë në NATO nga ana e Ankarasë.
Zyrtarët turq dhe amerikanë kanë thënë se anëtarësimi i Suedisë në NATO dhe shitja e avionëve F-16 nuk janë çështje të lidhura me njëra-tjetrën.
