SHBA-ja konfirmoi sot vdekjen e një amerikani të dytë në Sudan në vazhdën e dhunës midis palëve ndërluftuese në këtë vend, transmeton Anadolu.
“Mund të konfirmojmë vdekjen e një shtetasi të dytë amerikan dje. I shprehim ngushëllimet tona më të thella familjes”, u tha gazetarëve zëdhënësi i sigurisë kombëtare i Shtëpisë së Bardhë, John Kirby.
Kirby tha se udhëheqjes së forcave të armatosura sudaneze dhe grupit paraushtarak Forcat e Mbështetjes së Shpejtë (RSF) u është thënë nga SHBA-ja se kanë përgjegjësinë për të mbrojtur civilët, joluftëtarët, stafin humanitar dhe njerëzit nga vendet e treta që po përpiqen për të ruajtur jetët.
Palët ndërluftuese njoftuan një armëpushim të hënën, megjithëse ka raportime për dhunë dhe bombardime dhe të shtëna sporadike. Kirby tha se nivelet e dhunës duket se janë ulur ndjeshëm.
“Ne u bëjmë thirrje të dy fraksioneve ushtarake që të respektojnë plotësisht këtë armëpushim dhe ta zgjasin tutje”, tha ai.
“Dhuna duhet të ndalet”, shtoi zyrtari amerikan.
Kirby njoftoi të premten e kaluar vdekjen e amerikanit të parë për të cilin tha se ishte “vrarë tragjikisht” gjatë luftimeve. Ai nuk e ka identifikuar të ndjerin, por ka shprehur ngushëllime për familjen e atij personi.
Të paktën 460 njerëz janë vrarë dhe më shumë se 4.000 janë plagosur në përleshjet midis ushtrisë dhe forcave të RSF-së që nga 15 prilli, sipas Ministrisë së Shëndetësisë.
Një mosmarrëveshje doli në pah muajt e fundit midis ushtrisë dhe paraushtarakëve në lidhje me reformën e sigurisë ushtarake.
Reforma parashikon pjesëmarrjen e plotë të RSF-së në ushtri, një nga çështjet kryesore në negociatat me palët ndërkombëtare dhe rajonale për një kalim në një sundim civil e demokratik.
