Ndërsa Shtetet e Bashkuara dhe Ukraina kanë nënshkruar një marrëveshje të re për bashkëpunim ekonomik në fushën e burimeve natyrore, zëvendëspresidenti amerikan JD Vance ka paralajmëruar se konflikti i armatosur në Ukrainë nuk është afër përfundimit.
Në një intervistë për Fox News, Vance theksoi se fundi i luftës është në dorën e vetë palëve ndërluftuese, duke e cilësuar situatën si një “konflikt brutal dhe të egër” që kërkon vullnet të ndërsjellë për t’u ndalur.
Komentet e tij pasuan nënshkrimin e një marrëveshjeje mes zëvendëskryeministres ukrainase Yulia Svyrydenko dhe Sekretarit të
Thesarit të SHBA-së, Scott Bessent, që parashikon krijimin e një fondi të përbashkët për investime në rindërtimin e Ukrainës.
Nëpërmjet kësaj marrëveshjeje, SHBA siguron akses të privilegjuar në kontratat për shfrytëzimin e mineraleve dhe burimeve të tjera natyrore në territorin ukrainas – një hap që shihet si strategjik për praninë ekonomike dhe gjeopolitike amerikane në rajon.
Edhe pse marrëveshja nuk përfshin elementë të drejtpërdrejtë sigurie, analistët vlerësojnë se ajo përforcon lidhjet mes dy vendeve dhe sinjalizon një angazhim afatgjatë të Uashingtonit në Ukrainë, përtej dimensionit ushtarak.
Burimi: botasot.info
