Selena Gomez dhe nëna e saj, Mandy Teefey, janë paditur nga investitorët e kompanisë së shëndetit mendor Wondermind, të cilët pretendojnë se janë mashtruar për gjendjen financiare të biznesit.
Sipas padisë, investitorët që kishin investuar 1.2 milionë dollarë u bënë të besonin se kompania kishte infrastrukturën, drejtimin dhe burimet e nevojshme për sukses, ndërsa në të vërtetë “ishte në mes të falimentimit”.
Paditësit pretendojnë se u ishte thënë se Selena do të angazhohej aktivisht në marketing, se bashkë-CEO Daniella Pierson kishte një biznes me vlerë 200 milionë dollarë (afërsisht 171 milionë euro) dhe se Wondermind kishte siguruar partneritete me kompani si JPMorgan dhe Fidelity. Sipas tyre, këto deklarata ishin të rreme, shkruan DailyMail.
Padia pretendon gjithashtu se partneritetet nuk ekzistonin, iniciativat për të gjeneruar të ardhura nuk u realizuan dhe aplikacioni i premtuar nuk u ndërtua.
Investitorët thonë se mësuan për problemet e kompanisë vetëm pas një artikulli të The Cut në vitin 2025, i cili zbuloi krizën financiare dhe faktin se Wondermind kishte pushuar nga puna rreth 60 për qind të stafit.
Wondermind u themelua në vitin 2021 nga Selena Gomez, Mandy Teefey dhe Daniella Pierson. Investitorët po kërkojnë gjyq me juri. Përfaqësuesit e Gomez dhe Teefey nuk kanë komentuar ende mbi padinë.
Burimi: botasot.info
