Sekretari amerikan i Shtetit, Antony Blinken, shprehu dyshime në lidhje me raportimet për një sulm me dronë ndaj Kremlinit dhe tha se ai do të merrte gjithçka që vjen nga Moska “me dyshime të mëdha”, transmeton Anadolu.
“Së pari, i kam parë raportimet. Nuk mund t’i vërtetoj në asnjë mënyrë. Thjesht nuk e dimë. Së dyti, do të merrja çdo gjë që vjen nga Kremlini me dyshime të mëdha”, ka thënë Blinken në një aktivitet.
“Ne do të shohim se cilat janë faktet dhe është me të vërtetë e vështirë të komentosh apo spekulosh mbi këtë pa ditur se cilat janë faktet”, shtoi ai.
Blinken vuri në dukje se Ukraina është nën sulm të përditshëm nga agresioni rus, ku forcat e saj ushtarake dhe civilët sulmohen dhe madje vriten.
Rusia pretendoi më herët se Ukraina u përpoq të godiste rezidencën e Kremlinit me dy dronë, të cilët tha se u rrëzuan. Ukraina mohoi çdo përfshirje në sulm ndaj Kremlinit, të cilin presidenca ruse e quajti përpjekje “terroriste” nga Kievi.
Pas lajmit për tentativën e sulmit, Moska ndaloi fluturimet me dron në kryeqytet.
