Sanksionet kundër Rusisë mund të bëjnë që Stacioni Ndërkombëtar Hapësinor (ISS) të rrëzohet dhe të bjerë në det ose në tokë, tha kreu i agjencisë ruse të hapësirës Roscosmos.
Dmitry Rogozin, një mbështetës i zëshëm i pushtimit rus të Ukrainës, bëri thirrje që të hiqen sanksionet pasi ato mund të pengojnë funksionimin e anijes ruse që i shërben ISS.
Si rezultat, segmenti rus i stacionit, i cili ndihmon në korrigjimin e orbitës së tij, mund të ndikohet, duke shkaktuar që struktura 500 tonëshe të bjerë në det ose në tokë, shkroi shefi i Roscosmos në Telegram.
Duke publikuar një hartë të vendndodhjeve ku ISS mund të zbriste, ai tha se nuk kishte gjasa të ishte në Rusi.
Por popullatat e vendeve të tjera, veçanërisht ato të udhëhequra nga, siç thotë ai, ‘qentë e luftës’, duhet të mendojnë për çmimin e sanksioneve kundër Roscosmos.
NASA ka thënë më parë se po përpiqej të gjente një zgjidhje për ta mbajtur ISS në orbitë pa ndihmën e Rusisë.
