Pas argjentinasit Leandro Paredes, klubi i Romës ka bërë zyrtar me anë të një njoftimi në rrjetet sociale një tjetër transferim, atë të Renato Sanches. I cili vjen në huazim nga francezët e PSG-së.
“Roma njofton transferimin e mesfushorit Renato Sanches, i cili vjen në huazim nga PSG. Lojtari i datëlindjes 1997, i cili u shpall kampion Europe me Portugalinë, duke u bërë lojtari më i ri që fiton Europianin, vjen në klubin verdhekuq. Pas eksperiencave me: Benfican, Bayernin, Swansean, Lille dhe PSG.
Ai ka zhvilluar 32 paraqitje me Portugalinë dhe ka shënuar 3 gola. Mesfushori do të mbajë veshur fanellën me numrin 20. Mirë se vjen, Renato”, lexohet në postimin zyrtar të klubit kryeqytetas.
Për aventurën e re në kryeqytetin italian foli edhe 26-vjeçari luzitan. I cili nuk e fshehu entuziazmin për transferimin tek ekipi i Jose Mourinhos.
“Jam shumë i lumtur që kam ardhur në këtë klub të madh, projekti i klubit ishte ai që më bindi të vija këtu. Transferimi te Roma ishte zgjidhja e duhur për mua. Për çdo lojtar është shumë e rëndësishme mbështetja nga tifozët.
Sidomos në ditët e para. Dhe mua më kanë pritur shumë mirë. Tashmë nuk më ngelet më gjë tjetër, përveç se të jap gjithçka për fanellën”, theksoi Renato Sanches, i cili në të kaluarën ka qenë pranë firmës më Milanin.
Ndërsa drejtori sportiv i Romës, Tiago Pinto u shpreh se ardhja e Sanches ishte arritja e një objektivi të cilin e vëzhgonin prej kohësh:
“Kishim kohë që interesoheshim për Sanches. Jemi të lumtur që arritëm ta merrnim, mendoj se aftësitë e tij janë në lartësinë e pritshmërive të klubit”, u shpreh drejtuesi i klubit të Serie A.
