Udhëheqësit e Bashkimit Evropian hapën sot një samit dy-ditor në Bruksel, të ndarë për mundësinë dhe metodat e kufizimit të çmimit të gazit, me qëllim që të frenohet kriza energjetike e nxitur nga lufta e Rusisë kundër Ukrainës dhe pezullimi i dërgesave të gazit nga Rusia në BE.
Vendet kryesore të BE-së, Gjermania dhe Franca, janë në kampe kundërshtare, pasi Berlini është i dyshimtë për planet për të kufizuar çmimet e gazit, të cilat mbështeten nga shumica e anëtarëve.
Me të mbërritur në samit, presidenti francez Emmanuel Macron vuri në dukje domosdoshmërinë e unitetit evropian.
“Nuk është mirë as për Gjermaninë, as për Evropën që (ai vend) të izolohet. Është e rëndësishme që të arrijmë unanimitet për propozimet që kërkojnë një konsensus të gjerë”, tha Macron.
Kancelari gjerman Olaf Scholz tha se çdo mosmarrëveshje ka të bëjë me metodën, jo me qëllimin.
“Çmimet e gazit, naftës dhe qymyrit duhet të ulen, çmimet e energjisë elektrike duhet të ulen dhe kjo është diçka që kërkon një përpjekje të përbashkët nga të gjithë ne në Evropë,” tha Scholz.
Kryeministri holandez Mark Rutte tha gjithashtu se ai ka frikë se furnizimet me gaz do të përfundojnë jashtë Evropës në rast të vendosjes së një kufiri shumë të lartë çmimi për atë energji.
“Të gjithë duan që çmimi i gazit të jetë më i ulët, por ju gjithashtu dëshironi të siguroni vazhdimin e importit të gazit”, tha Rutte.
Mosmarrëveshja për kufizimin e çmimeve të gazit lë të kuptohet për bisedime të vështira në samit dhe një zgjidhje nuk do të jetë e lehtë të gjendet deri nesër pasdite, kur samiti do të përfundojë.
U njoftua se presidenti i Ukrainës, Volodymyr Zelensky, do t’u drejtohet liderëve në fillim të takimit përmes video-lidhjes dhe do të theksojë nevojën për unitet të fortë të BE-së në përballjen me Rusinë.
Scholz tha se Zelensky nuk duhet të ketë shqetësime të tilla, duke i përshkruar sulmet ruse ndaj infrastrukturës civile në Ukrainë dhe nxitjen e frikës me drone si “krime lufte”.
“Edhe taktikat e tokës së djegur nuk do ta ndihmojnë Rusinë të fitojë luftën. Ata vetëm forcojnë vendosmërinë dhe qëndrueshmërinë e Ukrainës dhe partnerëve të saj”, u tha Scholz deputetëve në Berlin përpara se të nisej për në Bruksel.
Çmimet e gazit natyror dolën jashtë kontrollit këtë verë, ndërsa vendet e BE-së u përpoqën, secila për vete, të siguronin rezerva sa më të mëdha gazi për dimër.
Tani liderët e BE-së do të përpiqen të standardizojnë blerjen e gazit sa më shumë që të jetë e mundur dhe të vendosin një kufi të përkohshëm në çmimin e asaj energjie.
Vendet anëtare ranë dakord më parë të reduktojnë kërkesën për gaz me 15 për qind gjatë dimrit. Ata morën përsipër të mbushin kapacitetet e depozitave të gazit në të paktën 80 për qind deri në nëntor, si dhe të ulin kërkesën për energji elektrike me të paktën pesë për qind kur ajo është në kulmin e saj.
Çështja e kufizimeve të mundshme të çmimeve të gazit në BE ka lëvizur vazhdimisht në agjendën politike për muaj të tërë pasi presioni i energjisë u intensifikua dhe 15 vende si Franca dhe Italia mbrojtën një ndërhyrje kaq të ashpër.
