Kuvendi Komunal i Mitrovicës, sonte në një seancë të jashtëzakonshme me 18 vota për, 10 kundër dhe 2 vota të pavlefshme, ka zgjedhur Safet Kamberin kryesues të Kuvendit, raporton KosovaPress.
Në një fjalë rasti, pas zgjedhjes, Kamberi u zotua se “kryesues do të bëj më të mirën për Komunën e Mitrovicës duke çuar përpara gjithçka që është në interes ë komunës”.
Ky është zotimi i Kamberit
“Një falënderim të veçantë për anëtarët e Kuvendit, për besimin që ma dhanë, që unë të jem kryesues i Kuvendit të Komunës së Mitrovicës. Dhe pa e zgjatur shume, unë vetëm diçka dua me iu premtua anëtarëve të Kuvendit. Unë si kryesues i Kuvendit, do të jem në nivelin e përgjegjësisë, do të respektojë në mënyrën më të mirë të mundshme Ligjin për vetëqeverisje lokale, po ashtu Rregulloren e Kuvendit dhe ju garantoj se secili anëtar i Kuvendit do ta ketë hapësirën e vet të diskutimeve. Kështu unë zotohem se unë si kryesues do të bëj më të mirën për Komunën e Mitrovicës duke çuar përpara gjithçka që është në interes ë komunës”, tha ai.
Kamberi tha se seanca e radhës, e rregullt e këtij kuvendi është të hënën (nesër) prej orës 10:00, ku do të do jenë në shqyrtim themelimin e dy komiteteve të rëndësishme dhe të përhershme, Komitetit për Politikë dhe Financa dhe Komitetin për Komunitete.
Në këtë seancë mori pjesë edhe kryetari i komunës, Faton Peci.
Paraprakisht, në njoftim për thirrje të seancës, u tha se kjo mbledhje po mbahet me orar të parregullt, meqë e njejta pritej të mbahej të hënën duke filluar nga ora 10:00.
“Arsyeja e ndryshimit të datës lidhet me zbatimin e nenit 43 të Ligjit nr. 03/L-040 për Vetëqeverisje Lokale; nenit 3, paragrafi 1, nënparagrafi 1.2, dhe nenit 5 të Udhëzimit Administrativ (MAPL) nr. 02/2015 për mbajtjen e mbledhjeve të Kuvendit të Komunës; nenit 50, paragrafi 1, nënparagrafi 1.2, dhe nenit 52, paragrafi 1, të Statutit të Komunës së Mitrovicës e cila parasheh mbajtjen e kësaj seance jo më larg se një muaj pas seancës konstituive e cila ishte mbajtur me 12 dhjetor 2025”, thuhet në njoftim.
Kështu, bazuar në këtë zhvillim, duket se data e thirrjes së seancës ishte llogaritur gabim, rrjedhimisht afati ligjor, andaj e njëjta është thirrur për sonte në ora 21:30.
Burimi: botasot.info
