Sekretari i Përgjithshëm i NATO-s, Mark Rutte, u ka bërë thirrje të 32 vendeve anëtare që të rrisin investimet në mbrojtje, duke shtuar fonde, pajisje dhe vëmendje politike ndaj aleancës më të madhe ushtarake në botë.
Thirrja vjen në një kohë kur Shtetet e Bashkuara po tërhiqen gradualisht nga roli i tyre udhëheqës në çështjet e sigurisë në Evropë.
Rutte ishte në Uashington këtë të enjte për takime me zyrtarë të lartë amerikanë, ndërsa përgatitet të presë samitin e radhës të NATO-s në Holandë, ku pritet të marrë pjesë edhe presidenti amerikan Donald Trump.
Në raportin e tij vjetor, të publikuar pa shumë bujë në faqen zyrtare të NATO-s, Rutte shkruan:
“Në vitin 2025 duhet të shtojmë ndjeshëm përpjekjet për ta mbajtur NATO-n si burimin kryesor të avantazhit ushtarak për të gjitha vendet tona. Liria dhe prosperiteti ynë varen prej saj.”
Situata në NATO është tensionuar që nga shkurti, kur Sekretari amerikan i Mbrojtjes, Pete Hegseth, paralajmëroi se SHBA-të do të përqendrojnë prioritetet e tyre të sigurisë jashtë Evropës, duke kërkuar që Evropa të marrë më shumë përgjegjësi për mbrojtjen e vet dhe të Ukrainës.
Në samitin e 2023-ës, vendet anëtare ranë dakord të shpenzojnë të paktën 2% të Prodhimit të Brendshëm Bruto për mbrojtjen. Megjithatë, vetëm 22 vende e kanë përmbushur këtë objektiv, ndërsa Belgjika, Kanadaja, Italia, Spanja dhe disa të tjera kanë dështuar ta arrijnë.
Shtetet e Bashkuara, ndonëse kanë ulur përqindjen e shpenzimeve të mbrojtjes në raport me PBB-në, mbeten kontribuesi më i madh financiar në NATO. Në vitin 2024 ato shpenzuan 3.19% të PBB-së për mbrojtjen, përkundër 3.68% në vitin 2014.
Rutte vlerëson se, “Mbështetja e NATO-s për Ukrainën mbeti e fortë në vitin 2024”, ndonëse një pjesë e aleatëve kanë filluar të tregojnë pasiguri për të ardhmen e marrëdhënieve me Kievin, sidomos në kontekstin e një administrate të re amerikane.
Kjo përfaqëson një ton më të rezervuar krahasuar me paraardhësin e Rutte, Jens Stoltenberg, i cili vetëm një vit më parë shkruante se “mbështetja për Ukrainën nuk është bamirësi, por është në interesin tonë të sigurisë.”
Burimi: botasot.info
