Zëvendës shefi i Këshillit shtetëror të Sigurisë në Rusi, Dmitry Medvedev tha të premten se është e “gabuar të mbash qëndrim zyrtar” me SHBA-në lidhur me incidentin e dronit në Detin e Zi, pasi Washingtoni “u tregua i pacipë”, por kontaktet duhet të mbahen, transmeton Anadolu.
Në një postim në Telegram, Medvedev tha se incidenti tregon se nuk ka asnjë konventë ndërkombëtare që rregullon fluturimet e dronëve.
Sipas tij, Kodi Ajror i Rusisë përcakton kushtet e “zonave të ndaluara” dhe “zonave të kufizuara”, ku fluturimet e avionëve, përfshirë dronët, janë ose të ndaluara ose të kufizuara.
Medvedev theksoi se kufizimet, të cilat janë të njohura për të gjithë përdoruesit e hapësirës ajrore, janë veçanërisht të rëndësishme në kohë lufte, posaçërisht duke pasur parasysh se “momenti i hyrjes me avion ose dron në detin territorial ndonjëherë është i vështirë për t’u rregulluar”.
“Në përgjithësi, që ta themi thjesht, amerikanët u treguan plotësisht të pacipë dhe është e gabuar të mbash qëndrim zyrtar me ta. Edhe pse kontaktet ushtarake janë të nevojshme, sigurisht”, tha ai.
Ministria ruse e Mbrojtjes tha se një dron, me transponderët e tij të fikur, u zbulua mbi Detin e Zi të martën.
Për të identifikuar fluturaken, u angazhuan avionë luftarakë të forcave të mbrojtjes ajrore në detyrë, ndërkaq droni, si rezultat i manovrimit të rrezikshëm, doli jashtë kontrollit, humbi lartësinë dhe u përplas në sipërfaqen e ujit.
Ndërkohë, Pentagoni pretendoi se një avion luftarak rus SU-27 u përplas me dronin amerikan në hapësirën ajrore ndërkombëtare mbi Detin e Zi, duke rrëzuar dronin amerikan.
Komanda Evropiane e SHBA-së pohoi se incidenti ndodhi pasi një avion rus dhe një tjetër SU-27 “kryen interceptim të pasigurt dhe joprofesional” të MQ-9 Reaper të SHBA-së, përfshirë hedhjen e karburantit mbi dronin dhe fluturimin pranë tij “në një mënyrë të pamatur, të pasigurt për mjedisin dhe joprofesional”.
