Shtatë persona, kryesisht fermerë, u vranë nga rrufeja në një fshat në shtetin verior të Indisë Uttar Pradesh, tha policia të enjten, duke e çuar numrin e të vdekurve nga rrufeja në 49 persona në shtet këtë javë.
Fermerët ishin strehuar nën pemë gjatë një shiu të rrëmbyeshëm muson, kur u goditën nga rrufeja të martën dhe vdiqën në çast. Sipas oficerit të policisë Hem Raj Meena, mes viktimave ishin katër anëtarë të një familjeje dhe disa kullotës bagëtish pranë qytetit të Kaushambi.
Numri i lartë i vdekjeve ka shtyrë qeverinë të nxjerrë udhëzime të reja se si njerëzit mund të mbrohen gjatë një stuhie rrufeje, tha zëdhënësi i qeverisë shtetërore Shishir Singh.
“Njerëzit po vdesin më shumë nga rrufeja sesa nga incidentet e lidhura me shiun, megjithëse kjo është koha kur njerëzit (zakonisht) vdesin nga përmbytjet ose incidente të tjera të lidhura me shiun,” tha Singh.
Sezoni i musoneve në Indi zgjat nga qershori deri në shtator.
Kol. Sanjay Srivastava, organizata e të cilit Lightning India Resilient Campaign punon me Departamentin Meteorologjik Indian, tha se rrufeja ka vrarë rreth 750 njerëz në të gjithë Indinë që nga prilli. Kjo përfshin 20 njerëz që vdiqën në shtetin lindor Bihar në dy ditët e fundit dhe 16 në shtetin Madhya Pradesh në Indinë qendrore në fillim të këtij muaji.
Sunita Narain, drejtoreshë e përgjithshme e Qendrës për Shkencën dhe Mjedisin, tha se ngrohja globale luan një rol në rritjen e numrit të goditjeve nga rrufetë. Një rritje e temperaturës me një gradë Celsius rrit vetëtimën me 12 herë.
Srivastava tha se shpyllëzimi, ndotja, kontribuojnë në ndryshimin e klimës, gjë që çon në më shumë rrufe.
JP Gupta, drejtor i Departamentit Meteorologjik, tha se stuhitë dhe vetëtimat janë shtuar këtë vit për shkak të rritjes së niveleve të ndotjes.
“Temperatura e lartë e tokës çon në avullim nga trupat ujorë që shtojnë lagështi në atmosferë. Prania e aerosoleve për shkak të ndotjes së ajrit krijon kushte të favorshme që retë e bubullimave të shkaktojnë aktivitet rrufeje”, tha Gupta.
Më shumë se 200 njerëz janë vrarë nga reshjet e mëdha dhe rrëshqitjet e baltës në shtetet indiane, duke përfshirë Assam, Manipur, Tripura dhe Sikkim, ndërsa 42 njerëz kanë vdekur në Bangladesh që nga 17 maji. Qindra mijëra njerëz janë zhvendosur në sezonin e musoneve.
