Pjesa e dytë e intervistës së Cristiano Ronaldos me Piers Morgan u publikua të sonte dhe në të ai zbuloi të ardhmen e tij përpara merkatos së janarit.
Cristiano Ronaldo ka pranuar se është e pamundur të thuhet se çfarë do të ndodhë në lidhje me të ardhmen e tij në Manchester United, duke këmbëngulur se fokusi i tij aktual është në Kupën e Botës dhe asgjë tjetër.
37-vjeçari është pa kontratë në “Old Trafford” në fund të këtij sezoni dhe e ka futur të ardhmen e tij në dyshime serioze pas intervistës së tij bombastike me Piers Morgan, në të cilën ai kritikoi United dhe trajnerin Erik ten Hag. Ai aktualisht është me kombëtaren portugeze, duke filluar rrugëtimin e tyre në Kupën e Botës në Katar javën e ardhshme.
United, siç tha në një deklaratë të lëshuar të hënën, ende nuk ka marrë një vendim për të ardhmen e Ronaldos dhe nuk do ta bëjnë këtë derisa “të jenë vërtetuar faktet e plota”. Perceptimi i përgjithshëm në mesin e tifozëve të United është se ai nuk do të luajë më për klubin.
Ronaldo donte të largohej nga “Old Trafford” në verë dhe intervista e tij shpërthyese me Morgan ka të ngjarë ta ketë afruar atë më pranë dëshirës së tij. Megjithatë, ai ka pranuar se nuk është i sigurt se çfarë do të ndodhë menjëherë pas Botërorit.
“Është e vështirë të thuhet tani sepse për momentin jam i fokusuar në Kupën e Botës”, tha Ronaldo për “TalkTV” kur u pyet nëse ai do të jetë lojtar i United më 1 janar.
“Sigurisht, Botërori im i pestë, nuk e di se çfarë do të ndodhë pas Kupës së Botës, por siç ju thashë më parë dhe do ta them përsëri, tifozët do të jenë gjithmonë në zemrën time. Dhe shpresoj se ata do të jenë pranë meje, edhe nëse unë kthehem, ose nëse nuk jam kthyer, ose nëse qëndroj ose çfarëdo.
Askush nuk është perfekt. Episodet në jetën që kemi të gjithë janë pjesë e të qenit njerëzor, është pjesë e të qenit njeri dhe të qenit baba gjithashtu. Unë gjithmonë do të bëj gabime. Por nuk e di, është vështirë të thuash tani se çfarë do të ndodhë pas Kupës së Botës, sepse fokusi im është për Kupën e Botës, për ekipin kombëtar të Portugalisë”, tha Ronaldo.
Ronaldo, i cili ka shënuar vetëm tre gola për United këtë sezon, ende beson se mund ta ndihmojë klubin, por sugjeroi se do të ishte e vështirë me infrastrukturën aktuale.
